[19-12-2018] A Xunta de Goberno Local aprobou de xeito definitivo, o pasado 29 de novembro, o proxecto de expropiación, polo procedemento de taxación conxunta, para poder executar o Plan Especial de Infraestruturas e Dotacións (PEID) para construír un novo CEIP na localidade do Milladoiro.Estas parcelas poranse a disposición da Consellería de Cultura, Educación e Ordenación Universitaria, da Xunta da Galicia, para a construción dun novo colexio público de infantil e primaria no Milladoiro. A superficie afectada polo Plan Especial, para a dotación de infraestruturas escolares, é de 20.000 metros cadrados, repartidos en 13 parcelas. Premendo nos enlaces que están a túa dereita, baixo o apartado de descargas, poderás obter o devandito anuncio e mailo proxecto de expropiación.

[18-12-2018] O Centro de Formación e Emprego de Aldea Nova acollerá, os vindeiros 12 e 13 de xaneiro, un curso de iniciación ao uso do GPS. Organizado pola asociación de sendeirismo Rutas a Pie, o curso desenvolverase ao longo dos dous días, en horario de 09:30 a 13.00 horas e de 15.00 a 19:00 horas. O obxectivo desta iniciativa, que conta coa colaboración do Concello de Ames, é facilitar ás persoas interesadas as técnicas básicas no uso do GPS para aplicalas á realización de rutas. O prezo por persoa será de 50 euros, e o número de participantes será de 10/12 persoas. O curso será impartido pola Escola Galega de Alta Montaña (EGAM).

[18-12-2018] As familias de Ames con cativos ou cativas de calquera idade rematarán o ano bailando e cantando na “Foliada de Nadal con Apego”, que se vai desenvolver o próximo venres, 28 de decembro, ás 17:00 horas, no Pazo da Peregrina de Bertamiráns. A través desta actividade, incluída dentro da programación infantil con Apego, trátase de organizar un encontro en que as familias amesás se coñezan, compartan, canten, bailen, aprendan cancións galegas, merenden e, sobre todo, o pasen ben. Nesta ocasión a Foliada céntrase nos cantos de Nadal. Para participar nesta actividade hai que inscribirse enviando un correo electrónico ao enderezo normalizacion@concellodeames.gal.

[17-12-2018] O Concello de Ames, a través da Concellaría de Comercio e Promoción Económica, puxo en marcha un ano máis, o Concurso de Escaparates de Nadal 2018. Nesta ocasión inscribíronse un total de 46 establecementos comerciais (23 en Bertamiráns e 23 no Milladoiro). Ademais, foron rexeitadas dúas inscricións por ser presentadas fóra de prazo. Os escaparates están expostos dende o día 14 de decembro ata o 7 de xaneiro de 2019. Como novidade, nesta xa décimo terceira edición, todos os establecementos foron premiados coa entrega duns paraugas de cortesía para que sexan compartidos entre a súa clientela. Estes paraugas están rotulados con dúas frases que, por unha parte, invitan a mercar no comercio local e por outra fomentan o espírito do compartir.