[06-11-2018] A oficina municipal de información xuvenil (OMIX) organiza para os meses de novembro e decembro un curso de dinamización de eventos infantís e o ciclo formativo “Máis que 2.0”. Este ciclo está composto por un curso de marca persoal e outro de marketing dixital, ambos destinados a maiores de 16 anos. Para participar en calquera dos tres cursos é necesario enviar cuberta a ficha de inscrición, dispoñible baixo o apartado de descargas, e unha fotocopia do DNI ao enderezo de correo electrónico omix@concellodeames.gal antes do martes 13 de novembro.

[05-11-2018] A Aula CeMIT de Bertamiráns organiza para este mes de novembro unha serie de cursos e videoconferencias destinadas aos usuarios que queiran afondar no manexo dos seus smartphones e das novas tecnoloxías. Asemade, impartiranse os dous últimos cursos do ciclo de ofimática, e continuarase cos cursos iniciados en outubro, destinados aos máis cativos. Os interesados en obter máis información ou reservar praza nalgunha das actividades que comezan este mes, poden dirixirse á web https://cemit.xunta.gal/gl/centro/9, achegarse á Aula CeMIT situada na Casa da Cultura de Bertamiráns, chamar ao número de teléfono 662 371 511 ou enviar un correo electrónico ao enderezo cemit.ames@xunta.gal.

[03-11-2018] O Concello de Ames, a través da Concellaría de Promoción Económica, e a organización Acción contra a Fame, colaboran na posta en marcha do programa Vives Emprende, correspondente ao segundo semestre deste ano, que asesora, forma e facilita o acceso a financiamento a persoas desempregadas ou con emprego precario que desexen emprender, especialmente a mulleres. As actividades de dito programa comezaron esta semana coa realización de dous talleres sobre a idea de negocio e o marketing, e continúan o martes 6 e mailo mércores 7 de novembro con dous novos obradoiros sobre o marketing mix e as competencias emprendedoras. En total, nos meses de outubro e novembro impartiranse un total de 10 talleres formativos.

[02-11-2018] Unha das apostas máis firmes que se está realizando dende o Concello é a mellora da accesibilidade das instalacións municipais e dos espazos públicos de Ames. Deste xeito, acaban de rematar as obras de mellora da accesibilidade na contorna da praza da Maía, situada na localidade de Bertamiráns. Estes traballos, que foron adxudicados á empresa 200 Joscón Construcciones SL por importe de 36.275,80 euros, contaron cunha subvención de 33.689,36 euros da Dirección Xeral de Maiores e Persoas con Discapacidade da Consellería de Política Social da Xunta de Galicia. Esta axuda está cofinanciada con fondos Feder do programa operativo Galicia 2014-2020.