[07-11-2018] A Aula da Natureza de Ames organiza para este sábado, 10 de novembro, a segunda saída micolóxica das tres programadas para este outono. A saída comezará ás 11.00 horas, e será dirixida pola experta en micoloxía, Sira López, co obxectivo de achegar o mundo dos cogomelos á veciñanza amesá. Para participar nesta actividade, que conta con un número limitado de prazas, é necesario inscribirse antes das 14.00 horas deste venres enviando o impreso de inscrición, que se pode atopar baixo o apartado de descargas desta nova, ao enderezo de correo electrónico auladanatureza@concellodeames.gal. Para obter máis información, pódese chamar ao número de teléfono 660 00 46 65, en horario de 9:00 a 14:00 horas.

[06-11-2018] A Asociación de empresarios do parque empresarial Novo Milladoiro amplía ata o 15 de novembro o prazo para participar no concurso fotográfico, que organiza en colaboración coa Concellaría de Promoción Económica e Turismo, a asociación de pequenos comerciantes Palmira Bulebar e a asociación de comerciantes de Bertamiráns. Este ano a temática do concurso xira en torno ao propio parque e a visión da empresa actual, sobre a que se pode enviar unha imaxe por participante, coa que se axuntará o título da obra e os datos persoais do autor/a. O 20 de decembro daranse a coñecer os nomes das persoas gañadoras nunha gala que se celebrará no salón de actos da Casa de Cultura do Milladoiro.

[06-11-2018] O Bertamiráns FC vén de presentar a súa estrutura deportiva, que se encargará da xestión das Escolas deportivas municipais do Concello de Ames, onde Adrián Alvite será o coordinador e Sergio Penas o secretario deportivo, na modalidade de fútbol sala en Bertamiráns.

[06-11-2018] A oficina municipal de información xuvenil (OMIX) organiza para os meses de novembro e decembro un curso de dinamización de eventos infantís e o ciclo formativo “Máis que 2.0”. Este ciclo está composto por un curso de marca persoal e outro de marketing dixital, ambos destinados a maiores de 16 anos, así como por un obradoiro de emprendemento xuvenil. Este último taller, enfocado a alumnos de 4º ESO e bacharelato, impartirase nos centros de ensino secundario de Ames. Para participar en calquera dos tres cursos é necesario enviar a ficha de inscrición cuberta e unha fotocopia do DNI ao enderezo de correo electrónico omix@concellodeames.gal antes do 13 de novembro.