Actualidade
Venres, 22 de setembro de 2017
[22-09-2017] A Unión de Consumidores de Galicia mantén dous puntos de asesoramento no Concello de Ames desde o pasado mes de novembro, en virtude dun convenio asinado co goberno municipal en setembro de 2016. Tras nove meses de actividade, UCGAL realizou balance dos resultados acadados e das accións informativas levadas a cabo. O maior número de consultas atendidas foron as relativas a servizos bancarios. Esta mañá realizouse unha xuntanza de balance na que participaron o alcalde de Ames, José Miñones, a concelleira de Promoción Económica, Isabel González, o secretario xeral da Unión de Consumidores de Galicia, Miguel López Crespo, o avogado Félix Caramés Blanco, e o técnico municipal, Jorge Couñago.
Xoves, 21 de setembro de 2017
[21-09-2017] O Concello de Ames, a través do departamento de Deportes, informa das listas de persoas admitidas e dos usuarios/as que están en lista de agarda nas Escolas Deportivas Municipais de Ames (curso 2017-2018).
Xoves, 21 de setembro de 2017
[21-09-2017] O departamento de Persoal do Concello de Ames fai público o decreto de modificación do Tribunal encargado de xulgar o proceso selectivo para o nomeamento como funcionario interino ata á cobertura de vacante dun/dunha técnico/a de Secretaría. Premendo no enlace que está a túa dereita, baixo o apartado de descargas, poderás consultar o devandito decreto.
Xoves, 21 de setembro de 2017
[21-09-2017] A Asociación Terras de Compostela GDR 19, á que pertence o Concello de Ames, organizou un plan formativo de fomento do emprego e da iniciativa emprendedora no medio rural que está dirixido á poboación activa (ocupados e desempregados). O curso de emprendemento e novos horizontes, que é gratuíto, impartirase en Ames os días 28 de setembro e 2, 3, 4, 5 e 6 de outubro. A duración inicial é de 30 horas, divididas en sesións de cinco horas durante seis días. O horario no que se imparte esta actividade é de 16:30 a 21:30 horas. O número de participantes por sede será de 15 persoas. Aínda quedan prazas dispoñibles para inscribirse neste curso.
Xoves, 21 de setembro de 2017
[21-09-2017] Cinco son os cursos que o movemento pedagóxico Nova Escola Galega organiza en Ames, ao longo de outubro e novembro. No mes de outubro, impartiranse un obradoiro vocal e corporal e outro de xestión socio-cultural. Pola súa banda, en novembro desenvolveranse os obradoiros de percusión e canto tradicional, de iniciación ao audiovisual e de autoestima feminina e novas masculinidades. Todos os cursos contan coa colaboración do Concello de Ames.
Xoves, 21 de setembro de 2017
[21-09-2017] O vindeiro sábado, 23 de setembro, Ames volverá acoller un novo Encontro Intercultural, aberto a toda a veciñanza. Será no Pazo da Peregrina de Bertamiráns, a partir das 17:00 horas. O Encontro incluirá a degustación dalgúns pratos tradicionais preparados por varias familias migrantes afincadas en Ames, un obradoiro de cometas guatemaltecas e dúas actuacións: a do grupo de danza popular venezolana “Alma Llanera” e a da cantante de tangos Rocío Freijanes.
Mércores, 20 de setembro de 2017
[20-09-2017] Na noite deste xoves, 21 de setembro, a Casa do Concello de Ames, en Bertamiráns, estará alumeada de morado para conmemorar o Día Mundial do Alzheimer. A exposición fotográfica “Lembranzas”, que relata o día a día de persoas con Alzheimer, pódese visitar na Casa da Cultura do Milladoiro ata o vindeiro 30 de setembro.
Mércores, 20 de setembro de 2017
[20-09-2017] A Aula de Informática do Milladoiro abre hoxe o prazo de inscrición para anotarse nos cursos que ofrece ao longo deste último trimestre de 2017: iniciación ao procesador de textos LibreOffice Writer en outubro, xornadas de internet (nivel medio) en novembro e elaboración de presentacións con Impress en decembro. O prazo de inscrición estará aberto ata que se cubran todas as prazas. Todos os cursos son gratuítos. Premendo a túa dereita, baixo o apartado de descargas, poderás obter as solicitudes de inscricións dos diferentes obradoiros.
Mércores, 20 de setembro de 2017
[20-09-2017] O obradoiro de emprego “RenovAmes-Brión II” comezou hoxe, 20 de setembro, no edificio de usos múltiples de Aldea Nova. O obradoiro, que terá unha duración de 6 meses, contará coa participación de 15 alumnas e alumnos traballadores que estarán guiados, ao longo destes meses, por catro persoas (o director do obradoiro, un mestre, un orientador e un auxiliar administrativo). Ao comezo desta primeira sesión, estiveron presentes o alcalde de Ames, José Miñones, e a concelleira de Promoción Económica, Isabel González, acompañados polo alcalde de Brión, José Luís García, e máis polos axentes de Desenvolvemento Local de ambos os Concellos.
Martes, 19 de setembro de 2017
[19-09-2017] O vindeiro sábado, 23 de setembro, Ames volverá acoller un novo Encontro Intercultural, neste caso, no Pazo da Peregrina de Bertamiráns. Será a partir das 17:00 horas, cando as veciñas e veciños de Ames poderán degustar algúns dos pratos tradicionais preparados por varias familias migrantes afincadas en Ames. O Encontro tamén contará coa actuación do grupo de baile popular venezolano “Alma Llanera”.
- ‹ anterior
- 743 de 1385
- seguinte ›