[05-10-2017] Este venres, 6 de outubro, volve o teatro a Ames da man da compañía Pistacatro que representará o espectáculo “Outono” na Casa da Cultura do Milladoiro. Trátase dun espectáculo de teatro-circo con música en directo no que se relata a viaxe nostálxica de catro artistas ao seu pasado, celebrando a amizade e os fracasos, ofrecendo unha ollada poética ao antigo oficio dos pallasos. As entradas están dispoñibles na Billeteira electrónica. Tamén se poderán mercar, de xeito anticipado e presencial, unha hora antes do comezo do espectáculo.

[05-10-2017] O programa piloto Convive.comigo ten como obxectivos captar, formar e avaliar a persoas e familias que estean interesadas en acoller unha ou un adolescente, obrigado xudicialmente a cumprir unha orde de convivencia. Impulsado por Arela, asociación responsable de varias iniciativas de apoio á infancia e á adolescencia, o programa será desenvolto, inicialmente, na provincia da Coruña.

[04-10-2017] O próximo sábado, 7 de outubro, comeza “Ciencia Divertida”, unha serie de obradoiros que procuran achegar o mundo científico ás nenas e nenos. Ademais da sesión deste sábado, haberá catro sesións máis repartidas periodicamente ata o mes de decembro. Serán os sábados, 14 de outubro, 4 e 11 de novembro e 2 de decembro, na Aula da Natureza. Para participar, é preciso anotarse entregando o formulario de inscrición no Rexistro municipal ou enviándoo ao enderezo electrónico auladanatureza@concellodeames.gal.

[04-10-2017] O departamento de Persoal do Concello de Ames fai público o anuncio co resultado do primeiro exercicio da fase de oposición do proceso selectivo para o nomeamento como funcionario/a interino/a ata á cobertura de vacante dun técnico de Secretaría. Dáse de prazo para a presentación de alegacións ao primeiro exame da fase de oposición ata o día 9 de outubro de 2017, incluído. Premendo no enlace que está a túa dereita, baixo o apartado de descargas, poderás consultar o devandito anuncio.