Actualidade
Domingo, 14 de xuño de 2026
O centro de depósito de residuos do Concello de Ames rexistrou un total de 684 entradas repartidas en 652 no Punto Limpo do Milladoiro, na rúa das Hedras, e 32 no Punto Limpo Móbil durante o pasado mes de abril. Cifras que volven poñer de manifesto a responsabilidade de toda a veciñanza de Ames en materia medioambiental e a importancia de separar e reciclar residuos. O Punto Limpo está situado na rúa das Hedras do parque empresarial Novo Milladoiro e ata alí pode achegarse toda a veciñanza de Ames para desfacerse de aqueles obxectos e materiais que non van aos colectores convencionais.
Sábado, 13 de xuño de 2026
Hoxe sábado, 13 de xuño, celebrouse no auditorio da Casa da Cultura do Milladoiro a gala de entrega de premios do XXIII Certame Literario Concello de Ames, un acto literario-musical no que participaron 16 dos 18 gañadores nas modalidades de poesía e de narrativa. O evento estivo presentado pola xornalista de Ames Radio, Belén Martínez. Da parte musical encargouse o alumnado da Escola Municipal de Música de Ames. Participaron máis de 20 alumnos e alumnas da modalidade de música e movemento e do combo sax-project. Todos os textos premiados publicaranse nun libro colectivo que verá a luz no vindeiro mes de abril.
Sábado, 13 de xuño de 2026
O Concello de Ames recolleu a pasada noite, no Hotel OCA Puerta del Camino, o Premio Colaboración Interadministrativa outorgado polo Colexio Profesional de Enxeñaría en Informática de Galicia, o CPEIG, pola súa capacidade para impulsar espazos de colaboración entre administracións, tecido empresarial, centros de coñecemento e cidadanía, convertendo a cooperación institucional nunha “ferramenta real de transformación economía e social”.
Venres, 12 de xuño de 2026
O Concello de Ames, mediante a Concellaría de Deportes e Promoción da Saúde, organiza unha nova edición das actividades deportivas e terapéuticas de verán que se desenvolverán en Bertamiráns e no Milladoiro durante os meses de xullo e agosto. As actividades de ioga, ioga terapéutico e taichi-chikung impartiranse en horario de mañá, mentres que a actividade de aquagym e as camiñadas no solpor serán en horario de tarde. Todas as actividades son de balde e non é preciso inscribirse previamente.
Venres, 12 de xuño de 2026
A Aula Municipal Tecnolóxica da Información e da Comunicación, a Aula AMTIC, organiza para estes meses de xuño e xullo tres novos cursos para público infantil e xuvenil arredor das artes dixitais. Para poder participar é preciso enviar cuberto este formulario de inscrición a informatica.milladoiro@gmail.com. Tamén se poderán facer inscricións no número de teléfono 698 172 347.
Xoves, 11 de xuño de 2026
O Consello de Administración de Augas de Ames EPEL aprobou o luns, 8 de xuño, na súa sesión ordinaria número 17 as contas anuais correspondentes ao exercicio 2025, que reflicten un resultado positivo de 590.091,84 euros, consolidando a estabilidade económica e financeira da entidade pública empresarial. Unha estabilidade xa demostrada no primeiro exercicio de 2024, ano no que comezou a funcionar a entidade Augas de Ames EPEL, que deixou un remanente de 822.000 euros para investimentos na rede.
Xoves, 11 de xuño de 2026
O CEIP Agro do Muíño, situado na parroquia amesá de Ortoño, recibiu esta mañá, no Museo Santiago Rey Fernández-Latorre de Arteixo, o premio provincial do proxecto de educación medioambiental Voz Natura pola súa proposta interdisciplinar “Agronautas, orbitando en verde”. Deste xeito, o centro contará cunha dotación de 2.000 euros grazas ao seu traballo no que participaron cincocentos alumnos e alumnas coordinados por Yolanda González e co deseño de actividades proposto pola técnica do departamento de Medio Ambiente do Concello de Ames, Patricia Reboreda.
Xoves, 11 de xuño de 2026
O vindeiro domingo, 14 de xuño, o Pazo da Peregrina de Bertamiráns será a sede dun laboratorio nómade de investigación para a preparación comunitaria ante a crise ecosocial, organizada pola plataforma Ames Pospetróleo e o Instituto Resiliencia en colaboración co Concello de Ames. A sesión enmárcase nunha liña de investigación de Marta Moreno Muñoz arredor da ecopedagoxía e prácticas comunitarios en contextos de crise ecosocial.
Xoves, 11 de xuño de 2026
O Concello de Ames, a través do departamento de Turismo, organizou para o sábado 20 de xuño, ás 12.00 horas, unha visita ao Pazo da Peregrina de Bertamiráns, que se enmarca dentro do programa de visita aos Lugares Rosalianos que marcaron a vida e obra de Rosalía. Ditas visitas están teatralizadas polos Quinquilláns. Esta actividade enmárcase dentro do convenio asinado polos Concellos de Ames, Brión, Dodro e Padrón para promover a ruta As pegadas de Rosalía. Para participar hai que enviar un correo electrónico ao enderezo turismo@concellodeames.gal.
Mércores, 10 de xuño de 2026
O Concello de Ames presentou esta mañá a novena edición do Ames Jazz, que se vai celebrar os días 3 e 4 de xullo no Pazo da Peregrina de Bertamiráns e que contará coas actuacións de Manuel Cebrián Trío, Suelen Estar Quartet e MBM Trío. Este ano, tamén se inclúe na programación un ensaio aberto da Orquestra Galega de Liberación. O obxectivo deste festival é darlle visibilidade ao panorama do jazz galego.
- ‹ anterior
- 17 de 700
- seguinte ›