O Concello de Ames presentou esta mañá a novena edición do Ames Jazz, que se vai celebrar os días 3 e 4 de xullo no Pazo da Peregrina de Bertamiráns e que contará coas actuacións de Manuel Cebrián Trío, Suelen Estar Quartet e MBM Trío. Este ano, tamén se inclúe na programación un ensaio aberto da Orquestra Galega de Liberación. O obxectivo deste festival é darlle visibilidade ao panorama do jazz galego.

A Concellaría de Normalización Lingüística acaba de publicar a listaxe de persoas gañadoras da vixésimo terceira edición do Certame Literario de Ames. Na edición deste ano, recibíronse un total de 186 traballos, e foi na categoría de narrativa para maiores de 18 anos na que houbo un maior número de participantes, con 65 obras recibidas. As persoas encargadas de xulgar os textos desta edición foron: Manuel Portas Fernández, Carlos Negro Romero e Dolores Vilavedra Fernández; as tres pertencentes ao ámbito literario e referentes na creación literaria galega actual. O acto de entrega de premios estará presentado por Belén Martínez, xornalista de Ames Radio, e terá lugar este sábado, 13 de xuño, ás 12:30 horas, na Casa da Cultura do Milladoiro. Pódese descargar a acta completa do xurado na seguinte ligazón.

O Goberno municipal do Concello de Ames visitou esta mañá o Centro Galego de Intelixencia Emocional, Saúde e Desenvolvemento Persoal, ElSuno, localizado en Biduído. Trátase dun espazo centrado en proporcionar ás persoas as ferramentas e os recursos necesarios para optimizar a súa calidade de vida. Cun equipo de profesionais altamente cualificados e que comparten a paixón polo benestar humano, este centro oferta unha ampla gama de servizos e programas en materia holística, dende terapias ata cursos e talleres de meditación. Dende ElSuno tamén abordan un programa especial sobre o Camiño de Santiago, chamado “A experiencia interior do Camiño orixinal”.

O deporte amesán está de parabéns. O Club Baloncesto Ames acaba de escribir a páxina máis brillante da súa historia ao conseguir o ansiado ascenso á 2ª División Autonómica. Este fito deportivo coincide, ademais, cunha data moi sinalada para a entidade: a celebración dos seus 20 anos de historia, dúas décadas de traballo na promoción do baloncesto no concello que agora ven a súa recompensa no máis alto nivel autonómico.