O Concello de Ames pon en marcha por oitavo ano consecutivo os Premios Lingua e Empresa, co obxectivo de recoñecer o uso e fomento da lingua galega na actividade empresarial. Optarán a este galardón todas as empresas, con sede social ou centro de actividade no concello de Ames, que sexan propostas ata o 21 de novembro por calquera persoa ou entidade, ou pola propia empresa que queira participar. A dotación económica dos dous premios que se outorgan é de 1.500 euros, que serán repartidos entre dúas categorías. A organización destes premios corre a cargo das Concellarías de Normalización Lingüística e Promoción Económica. Un total de 72 empresas presentáronse a este certame nas sete edicións anteriores, das cales 16 foron premiadas. Premendo nestas ligazóns pódense descargar as bases do concurso e a ficha de inscrición.

Este pasado xoves, 9 de outubro, rematou o Obradoiro de acollemento lingüístico “En galego, co teu acento” que se desenvolveu en Bertamiráns durante case un mes. Nesta ocasión, participaron un total de 14 persoas procedentes de diferentes lugares que, ao longo destas semanas, crearon un espazo de convivencia e intercambio cultural, ademais de aprendizaxe da lingua e cultura galegas. Por outra banda, o vindeiro luns, 13 de outubro, dará comezo a quenda deste mesmo obradoiro na localidade do Milladoiro, no que participarán un total de 20 persoas. 

O programa Apego continúa coa súa programación para as crianzas nestes meses de outono. Desta volta, o venres 10 de outubro, ás 18.00 horas, haberá un concerto no auditorio da Casa da Cultura de Bertamiráns a cargo da Banda dos Insectos. Chegan ao programa Apego Ames para presentar un proxecto de música rock que pretende familiarizar a rapazada cos valores cooperativos e co deporte. Esta proposta é de balde e está dirixida para público familiar. O prazo de inscrición está aberto desde o 2 ata o 9 de outubro. Para participar é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas asistentes, a idade das crianzas e un teléfono de contacto.

O programa Apego continúa coa súa programación para as crianzas nestes meses de outono. Desta volta, organizan a actividade “Onde nace a lingua” de Marta Ortiz, un espectáculo de contos, adiviñas, xogos e música onde os máis pequenos poderán asentar as súas competencias lingüísticas dun xeito lúdico e participativo. Terá lugar ás 18.00 horas, o vindeiro venres 3 de outubro, na Casa da Cultura do Milladoiro. Esta proposta é de balde e está dirixida para público familiar. O prazo de inscrición está aberto desde hoxe, xoves 25 de setembro, ata o vindeiro día 2 de outubro. Para participar é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas asistentes, a idade das crianzas e un teléfono de contacto.