Durante este mes de outubro o proxecto Apego organiza unha nova actividade. Tratase do concerto da Banda dos Insectos, que se vai a celebrar o venres, 10 de outubro, ás 18.00 horas, auditorio da Casa da Cultura de Bertamiráns. A Banda dos Insectos defínense como o grupo máis roqueiro de toda a galaxia e teñen preparado un concerto cheo de ritmo e diversión con cancións que falan de compañeirismo, respecto, igualdade e solidariedade.  

Chegan ao programa Apego Ames para presentar un proxecto de música rock que pretende familiarizar á rapazada cos valores cooperativos e co deporte. Será un concerto cheo de ritmo e diversión para toda a familia.

Esta actividade é de balde e está dirixida a un público familiar. O prazo de inscrición está aberto dende hoxe, día 2 de outubro, ata o vindeiro xoves, 9 de outubro e, para participar, é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas asistentes, a idade das crianzas e un teléfono de contacto. Non se admitirán inscricións fóra de prazo e as prazas asignaranse por orde de recepción de solicitude.

O programa Apego, un vehículo de transmisión da lingua
O programa Apego é un proxecto de dinamización lingüística dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, achegando recursos e unha ampla proposta de actividades lúdicas e educativas.

As persoas interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario “Súmate ao apego”, que está dispoñible na páxina web do programa, apego.gal.