O CEIP Agro do Muíño foi o colexio elixido pola Consellería de Educación, Ciencia, Universidades e FP, para presentar Galicia explora o ceo. Camiño da eclipse 2026, a programación divulgativa e científica da Xunta de Galicia nos centros escolares con motivo da eclipse solar do 12 de agosto. A programación, coordinada polo Centro de Innovación Educativa e Dixital, articúlase en 26 iniciativas deseñadas para acompañar á comunidade educativa ao longo do curso e están organizadas en catro bloques cun enfoque interdisciplinar. Ademais, o Concello de Ames está elaborando unha programación específica para poder ver a eclipse solar dende diferentes lugares do municipio.

Dende este venres, 16 de xaneiro, e ata o venres 30 de xaneiro, estará aberto o prazo para inscribirse no servizo de conciliación Primavera Lúdica, que se desenvolverá os días 30 e 31 de marzo e 1 e 6 de abril de 2026. No programa poderán participar familias empadroadas no Concello de Ames, con nenos e nenas escolarizados no segundo ciclo de educación infantil ou de primaria no curso 2025-2026, e que acrediten a necesidade de conciliar a vida laboral coa familiar. A Primavera Lúdica ten un horario de 7:30 a 16:00 horas, e inclúe os servizos de comedor e Bos Días. As familias interesadas deberán entregar a documentación necesaria na Sede electrónica do Concello de Ames, ou nas oficinas de asistencia en materia de rexistro do Concello de Ames (O Milladoiro e Bertamiráns).

A Xunta de Goberno Local aprobou o pasado 11 de decembro a concesión de axudas por valor de 982,09 euros entre 14 solicitantes das axudas para a adquisición de libros de texto e material escolar destinadas ao alumnado do segundo ciclo de educación infantil (curso 2025-2026). O importe máximo concedido por cada nena ou neno ascende a 120 euros. Denegouse dita axuda a 6 solicitantes por presentar a solicitude fóra de prazo ou porque a unidade familiar superaba o 100% do IPREM.

A Xunta de Goberno Local aprobou o pasado 4 de decembro a concesión de axudas por valor de 19.999,16 euros, para a promoción de actividades organizadas polas ANPAS dos centros educativos municipais durante o exercicio 2025. Os conceptos subvencionables son os de viaxes culturais, actividades extraescolares, organización de encontros e xornadas, mobiliario, material didáctico, e actividades que fomenten a conciliación da vida laboral e familiar durante as xornadas lectivas. Un total de 9 ANPAS beneficiaranse desta convocatoria de axudas.