Desde mañá, 2 de setembro, ata o vindeiro día 10 estará aberto o prazo de inscrición nos obradoiros de acollemento lingüístico “En galego, co teu acento!”, unha iniciativa que busca aproximar a veciñanza á lingua e á cultura galegas dun xeito práctico e progresivo, así como favorecer a cohesión social e a integración das persoas procedentes de fóra de Galicia. Bertamiráns e O Milladoiro acollerán cadanseu obradoiro, de case un mes de duración, con sesións de dúas horas e en horario de mañá, de luns a xoves. As inscricións, de balde, poden realizarse de xeito presencial acudindo ao Servizo de Normalización Lingüística, situado no Pazo da Peregrina de Bertamiráns, ou á oficina do Servizo de Atención ás Persoas Migrantes (SAMI), situada na rúa de Abaixo, número 10, do Milladoiro. Tamén poderá formalizarse a inscrición chamando por teléfono aos números 662 377 215 / 981 535 941. 

A Concellaría de Normalización Lingüística fixo públicas as cifras de participación e as persoas que xulgarán os textos desta décimo novena edición do Certame Literario de Ames. Este ano presentáronse uns 152 traballos, números moi parellos a anteriores anos. O xurado desta edición está formado por pola profesora e escritora María López Sández, o poeta e profesor Ismael Ramos e o profesor e crítico literario Armando Requeixo, os tres veciños e veciñas de Ames. A súa decisión farase pública o 10 de maio a través da web municipal e das redes sociais do Concello de Ames. Tres días despois, o venres 13 de maio terá lugar a entrega de premios na Casa da Cultura do Milladoiro.

Este xoves, 21 de agosto, celébrase unha nova sesión dos Serán de Ames que estará protagonizada por As Armadanzas. Montse Rivera e Mercedes Prieto ofrecerán o espectáculo “Do Courel ao Condado” no que se xunta música e teatro. O espectáculo dirixido ao público familiar desenvolverase detrás do Local Social de Bugallido ás 20.00 horas. A programación dos Seráns de Ames pecharase o vindeiro xoves, 28 de agosto, en Tapia, cos Xogos de Miudiño e unha actuación musical a cargo de Mary Iglesias. Estas actividades son de acceso libre e gratuíto.

Peter Punk e Brais das Hortas pechan o abril do Apego de Ames cun concerto punk infantil, no que dous cantantes de xéneros tan aparentemente distantes como a música infantil e o “punk” comparten escenario e crean un espectáculo musical e de “clown” divertido e participativo. Será o xoves 28 de abril na Casa da Cultura do Milladoiro, ás 18:00 horas. As inscricións para o concerto, de balde e dirixido ao público infantil e familiar, poderán realizarse dende hoxe ata ao 27 de abril, enviando un correo ao enderezo normalizacion@concellodeames.gal no que se indiquen nome e apelidos das persoas asistentes, teléfono de contacto e idade das crianzas.