O Concello de Ames e o Club de Natación Cidade de Santiago organizan o próximo sábado, 21 de setembro, a Tapia Swinway, unha travesía a nado composta de tres probas para un total de cinco categorías. A concelleira de Deportes, Susana Señorís, o concelleiro de Transición Ecolóxica e Medio Ambiente, Manuel Lens, e David Lata, do Club de Natación Cidade de Santiago, compareceron esta mañá en rolda de prensa para presentar o evento, aberto aos nadadores federados e non federados. As inscricións, que teñen un custo de tres euros, pódense facer a través de emesports.es ou presencialmente o propio día da celebración da proba, na praia fluvial de Tapia, entre as 10:00 e as 10:45 horas.

O salón de actos do CEIP de Ventín acolle este domingo, 14 de xullo, a presentación do Campus da Real Federación Española de Fútbol que se desenvolverá no Concello de Ames entre o 14 e o 27 de xullo. Á presentación acudirán Joaquín de Ramos, responsable organizador dos campus da RFEF e Susana Señorís, concelleira de Deportes e Atención Veciñal de Ames, que estarán acompañados por  algúns membros do goberno municipal e o equipo técnico que impartirá as clases durante o campus. O acto comezará ás 17.30h, e nel explicarase o programa da actividade, e daráselle a benvida aos participantes da primeira quenda, que transcorrerá do 14 ao 20 de xullo.

O Concello de Ames organizou, co control técnico da Federación Galega de Atletismo, a primeira edición do Cros Concello de Ames. O evento deportivo comezou ás 11.00 horas coa disputa do Campionato da Xunta de Galicia de campo a través absoluto por remudas mixto, no que gañaron os/as atletas da Sociedade Ximnástica Pontevedra. A continuación, disputáronse as probas sub 18, sub 16, sub 14, sub 12 e sub 10, femininas e masculinas. As probas realizáronse o sábado pasado, 12 de outubro, na localidade de Aldea Nova, ao carón das pistas municipais de tenis de dita localidade. Nas categorías escolares inscribíronse 102 rapaces e rapazas, mentres que no campionato galego de remudas participaron 48 atletas (12 equipos de catro participantes cada un, con dúas mulleres e dous homes por equipo). Preme nesta ligazón para ver a galería de imaxes do Cros Concello de Ames.

Setenta persoas participaron na Andaina Saudable do mes de abril. As persoas participantes percorreron a segunda etapa do Camiño de Santiago dende O Barbanza “A orixe”. Camiñaron ao redor de 15 quilómetros, partindo dende a praia do Vilar ata a praza Porta do Sol, en Ribeira. A seguinte andaina organizada pola Concellaría de Deportes e Promoción da Saúde, dentro do programa municipal de Andainas Saudables, terá lugar o sábado 27 de maio. Nesta nova xornada os participantes percorrerán a 3ª etapa deste Camiño de Santiago “A orixe” entre Ribeira e A Pobra do Caramiñal.