O curso 2018-2019 das Escolas deportivas municipais chega ao seu fin e como todos os anos ao final de tempada celébrase unha festa de clausura onde os rapaces e rapazas fan unha demostración do aprendido ao longo destes meses nas actividades que participaron. O acto de clausura será este venres, 31 de maio, a partir das 16.30 horas, nos pavillóns polideportivos e na pista exterior da área deportiva do Milladoiro. Trátase dun evento familiar e festivo no que haberá distintas exhibicións deportivas e clases abertas de ioga, spinning e squash.

O Concello de Ames, a través da Concellería de Deportes, informa dos campus e campamentos de verán que se desenvolverán durante estes meses en Ames. En total, o Concello e a Deputación da Coruña colaboran en 7 campamentos e campus de diferentes clubs e entidades deportivas de Ames. Todos están previstos entre os meses de xullo, agosto e setembro.

Na actualidade estanse executando obras de mellora nos pavillóns polideportivos de Bertamiráns e do Milladoiro por valor de 263.551,59 euros. As obras de reparación da cuberta do pavillón polideportivo de Bertamiráns foron adxudicadas á empresa Excavaciones y Transportes Ivanca SL por un importe total de 169.050,59 euros. Por outra banda, as obras para realizar melloras térmicas e acústicas no pavillón polideportivo do Milladoiro foron adxudicadas á empresa Kaizen Management SL por 94.501 euros. Ditas obras teñen o obxectivo de mellorar estas instalacións municipais que  son moi empregadas por asociacións e clubs deportivos ao longo de todo o ano. Os proxectos son sufragados a través do POS+ 2021 e 2022.

Un ano máis, o Concello de Ames apostou pola promoción do deporte, unha actividade lúdica e mental que mellora substancialmente a vida de quen o practica. Por este motivo, a Concellaría de Deportes organizou no Milladoiro unha nova edición do Día do Deporte, no que a veciñanza amesá puido participar en diferentes deportes ao longo de toda a xornada. Así, as e os asistentes participaron de diferentes actividades de grupo, impartidas por clubs de Ames, como son o baloncesto, fútbol sala, voleibol, tenis, patinaxe, atletismo, xadrez ou piragüismo, xunto con outras actividades dirixidas a adolescentes e maiores como son o zumba, step, ioga, spinning, body combat ou pilates. Ademais, o Concello ofreceu a posibilidade de probar novas disciplinas nesta edición, como o squash e o golf.