Premendo na ligazón que está ao pé deste aviso pódese obter o menú das escolas infantís municipais de Ames. Este menú foi elaborado pola nutricionista municipal do Concello de Ames.

A Escola Municipal de Música de Ames dará comezo o vindeiro luns, 15 de setembro, as clases deste curso 2025-2026. Cómpre lembrar que, debido ás obras que se están a realizar no edificio da EMMA, a entrada debe facerse pola porta principal situada cara a Rúa da Ribeira.

O luns, 8 de setembro, abre o prazo de preinscrición na nova programación das Escolas deportivas do Concello de Ames para o curso 2025-2026. O prazo de preinscrición estará aberto ata o día 14 de setembro. A xestión realizarase de forma telemática a través da páxina web de Cronos. Para poder inscribirse é necesario darse de alta na plataforma Cronos seguindo as indicacións da propia plataforma. No caso dun/dunha menor, primeiro deberá de darse de alta o pai, nai ou titor como titular (tipo de rexistro) e despois darase de alta o/a menor como beneficiario/a (tipo de rexistro). Neste prazo de inscrición, cada persoa só poderá inscribirse nunha escola deportiva e non se permitirá a inscrición en máis dun grupo da mesma actividade. Nas actividades que haxa máis preinscricións que prazas ofertadas, realizarase un sorteo o 15 de setembro. Non se conceden as prazas por orde de inscrición. A listaxe de admitidos publicarase o 16 de setembro na web municipal.

Desde o 2 de setembro ata o vindeiro día 10 está aberto o prazo de inscrición nos obradoiros de acollemento lingüístico “En galego, co teu acento!”, unha iniciativa que busca aproximar a veciñanza á lingua e á cultura galegas dun xeito práctico e progresivo, así como favorecer a cohesión social e a integración das persoas procedentes de fóra de Galicia. Bertamiráns e O Milladoiro acollerán cadanseu obradoiro, de case un mes de duración, con sesións de dúas horas e en horario de mañá, de luns a xoves. As inscricións, de balde, poden realizarse de xeito presencial acudindo ao Servizo de Normalización Lingüística, situado no Pazo da Peregrina de Bertamiráns, ou á oficina do Servizo de Atención ás Persoas Migrantes (SAMI), situada na rúa de Abaixo, número 10, do Milladoiro. Tamén poderá formalizarse a inscrición chamando por teléfono aos números 662 377 215 / 981 535 941.