[09-05-2018] Este martes, 8 de maio, o Salón de Plenos da Casa do Concello acolleu unha segunda xuntanza entre membros da Concellaría de Medio Ambiente e voluntarias e voluntarios da agrupación de Protección Civil de Ames. O obxectivo deste encontro foi proseguir coa coordinación dos traballos realizados de control e loita contra a avespa velutina, así como avaliar as actuacións levadas a cabo ata o momento. Durante a próxima semana, a agrupación de Protección Civil colocará unha vintena de trampas naqueles lugares do concello con menos presencia destas. Á xuntanza asistiron o concelleiro de Medio Ambiente, Javier García, e o concelleiro de Obras Públicas e Servizos Básicos e presidente da agrupación amesá de Protección Civil, Blas García; así como a técnica municipal de Medio Ambiente, Patricia Reboreda, e membros de Protección Civil de Ames encargados da xestión da vespa velutina.

[08-05-2018] A concienciación da cidadanía amesá co medio volveu quedar reflectida nas cifras de rexistro do centro de depósito de residuos Punto Limpo, situado no polígono do Milladoiro. Desta maneira, no mes de abril, os datos amosan un pequeno incremento das entradas con respecto aos meses anteriores, acadando as 509. As cifras poñen de manifesto, deste xeito, que a veciñanza do Concello continúa a empregar o Punto Limpo á hora de desfacerse daqueles obxectos e materiais que non van aos colectores convencionais de materiais orgánicos, inorgánicos, vidro ou papel.

[07-05-2018] O pasado sábado, 5 de maio, o Auditorio de Ferrol acolleu a fase final do Club de Debate 2018, na que participaron seis equipos finalistas procedentes de diferentes centros educativos de secundaria (CPI Eusebio Lorenzo Baleirón de Dodro, IES Xulián Magariños de Negreira, IES Luis Seoane de Pontevedra e IES de Ames). Do instituto de Bertamiráns participaron os equipos Abrapalabra e Apalabrando, gañadores da fase de zona de Ames que se celebrou no mes de marzo . O tema escollido para a final foi “As Tic favorecen o uso do galego”. Após a realización dos debates, o equipo Abrapalabra obtivo a primeira posición nas clasificacións, mentres que o Equipo 1 do IES Xulián Magariños de Negreira acadou o segundo posto e o grupo do CPI IES Eusebio Lorenzo Baleirón o terceiro. O premio da fase final consistirá nunha viaxe multiaventura dunha fin de semana para vinte persoas.

[07-05-2018] O Concello de Ames dá a coñecer hoxe, 7 de maio, o nome das obras premiadas na décimo quinta edición do Certame Literario de narrativa e poesía. O concurso reuniu un total de 166 traballos procedentes de toda Galicia e de varias localidades do resto de España. Na modalidade de poesía houbo 86 traballos, mentres que en narrativa presentáronse 80 obras. Este ano o xurado do certame estivo composto pola escritora e profesora María López Sández; polo actor, director e guionista, Daniel Vilaverde Framil; e polo profesor e crítico literario, Armando Requeixo. Os premios entregaranse o día 16 de maio nun acto que se desenvolverá na Casa da Cultura do Milladoiro.