[11-05-2018] A ruta do Rego da Andoriña é o recorrido escollido para a realización da andaina solidaria, organizada polo asociación Solidariedade Galega co Pobo Saharauí (SOGAPS), para este domingo 13 de maio. A camiñada terá un prezo simbólico: 5 euros para as persoas e 1 euros para os cans. O diñeiro recadado irá destinado ao pagamento dos billetes das nenas e nenos saharauís que cada verán veñen a Galicia, a través do programa Vacacións en Paz. Para asistir ou para obter máis información, pódese chamar ao número de teléfono 646 320 660 ou enviar un correo electrónico ao enderezo eybarra.sogaps@gmail.com. A andaina partirá ás 10:30 horas da praia fluvial de Tapia. A actividade conta coa colaboración do Concello de Ames.

[10-05-2018] A aprobación do Regulamento de Participación Cidadá do Concello de Ames foi un dos compromisos adoptados pola Alcaldía no acordo de investidura aprobado en xuño de 2015. Actualmente, e despois de varios meses de traballo, o Regulamento vén de ser entregado aos grupos da municipais da oposición, para que estes poidan facer as súas propias achegas ata o 24 de maio. O novo Regulamento, que será levado a pleno no mes de xuño, busca aumentar a participación democrática e cívica da cidadanía na toma de decisións e na xestión do Concello, tornándoo, desta maneira, aberto e transparente para as veciñas e veciños de Ames.

[10-05-2018] O Concello de Ames fixo público este xoves, 10 de maio, o nome das obras premiadas na décima edición do Certame Artístico-Literario Intercentros, dirixido ao alumnado amesán, e que contou con 74 traballos presentados. Este ano o xurado do certame estivo composto por Elba Baldomir Turnes e Rosa Moreiras Cuñarro, persoal do Servizo de Normalización Lingüística do Concello de Ames, así como por Isabel Vaquero Quintela, concelleira de Comunicación e Normalización Lingüística. Os premios entregaranse o día 16 de maio nun acto que se desenvolverá na Casa da Cultura do Milladoiro.

[09-05-2018] Este sábado, 12 de maio, o centro comercial Novo Milladoiro acollerá un concurso de cociña sen glute, a partir das 11:00 horas. Dirixido a crianzas entre os 5 e os 14 anos, o concurso avaliará a realización de receitas sinxelas sen uso de lume. A competición incluirá probas individuais e grupais, así como a elaboración dun entrante, dun prato principal e de dúas sobremesas. Para participar será preciso inscribirse a través dos números de teléfono 981 104 467 e 679 461 003 ou do enderezo de correo electrónico info@celiacosgalicia.es. O concurso está organizado pola Asociación de Celíacos de Galicia en colaboración con Mercadona. As crianzas gañadoras recibirán un lote de produtos deste supermercado.