A Xunta de Goberno Local aprobou o pasado 26 de decembro a adxudicación do contrato das obras de pavimentación de viarios no núcleo de Seares de Abaixo, na parroquia de Ames, por 132.348,43 euros (IVE incluído), á empresa SYR-AMG SL. Este proxecto, que se sufraga con cargo ao POS+ 2024, enmárcanse dentro do plan de arranxo dos interiores de núcleos do rural. Estas obras xa están executándose na actualidade.

O Concello de Ames, a través do departamento de Cultura, organiza “Malabareando”, un obradoiro de malabares dirixido para os nenos e nenas a partir dos 6 anos e que se realizará o vindeiro xoves 13 de febreiro, ás 18.00 horas, no auditorio da Casa da Cultura de Bertamiráns. As crianzas deberán de estar acompañadas dun adulto. Hai 16 prazas dispoñibles, sen contar ás persoas maiores de idade, e os interesados en participar poden inscribirse enviando un correo a cultura@concellodeames.gal.

A Aula Municipal Tecnolóxica da Información e da Comunicación do Milladoiro (AMTIC) organiza para o vindeiro mércores, 12 de febreiro, unha conferencia sobre ciberseguridade. A actividade desenvolverase en horario de 18.30 a 19.30 horas no auditorio da Casa da Cultura de Bertamiráns. Impartiranse nocións para coñecer as posibles ameazas e perigos da internet na actualidade, así como ferramentas e consellos para protexernos. A entrada é aberta a todas as persoas que queiran acudir. Previamente, ás 18.00 horas, realizarase a clausura e entrega de diplomas dos cursos de alfabetización dixital nas parroquias, que comenzaron no pasado mes de outubro. Estes cursos foron impartidos en Covas, Augapesada, Tapia e Ortoño, e neles participaron 25 persoas.

O Pleno aprobou por unanimidade este martes, 4 de febreiro, a participación do Concello de Ames no Plan provincial de cooperación ás obras e servizos de competencia municipal (Plan único de concello) “POS+ 2025” da Deputación provincial da Coruña. O Concello de Ames vai destinar 444.207,42 euros, para o financiamento de gasto corrente; e 1.073.870,30 euros para sufragar seis obras. Tamén se aprobou por unanimidade a participación no POS+ Adicional 3/2025 para a redución da débeda coa Deputación, por importe de 271.894,53 euros, pola utilización do préstamo provincial nos Plans 2015 a 2023; e o recoñecemento extraxudicial de crédito 1/2025 por importe de 124.162,38 euros. Podes ver a gravación do pleno na canle de Youtube do Concello de Ames.