Os Premios Youtubeiras+ xa teñen gañadoras. Ao longo da gala, deuse a coñecer o fallo do xurado, que decidiu seis dos sete galardóns, así como tamén o Premio do Público, que determinou unha votación dixital na que participaron 5.056 persoas. Exército Mekemeke fíxose co galardón na categoría de canle de YouTube e Sara Seco levou o galardón á canle de TikTok. Pola súa banda, Prado Rúa acadou o Premio á Creación de Contidos, Luís do Río recibiu o Premio á Calidade Lingüística, Rebelico Revista conquistou o Premio Rede e Galiactiva gañou o Premio Revelación. O vídeo A revolución galega de 1.846, da canle Orgullo Galego, logrou o Premio do Público. Os galardóns contan cunha dotación económica total de 7.500 euros, repartidos da seguinte maneira: as categorías Canle de Youtube e Canle de TikTok están dotados con 1.250 euros, mentres que no resto de categorías as canles persoas premiadas levan 1.000 euros.

A Concellería de Mocidade inicia as actividades do programa Trouleando para este 2025. Desta volta, os mozos e mozas de Ames poderán gozar dunha tarde de paintball no recinto de Eo dos Menecos, en Teo, o vindeiro sábado 22 de febreiro. A actividade é de balde e está dirixida para a mocidade amesá nada entre 2012 e 1995. o prazo para inscribirse comeza este mércores día 5 e estará aberto ata o vindeiro mércores 12 de febreiro. Hai 40 prazas dispoñibles e adxudicaranse por orde de chegada. Pódese descargar a ficha de inscrición na seguinte ligazón.

A Xunta de Goberno Local aprobou este pasado xoves, 30 de xaneiro, a concesión dos premios ás persoas gañadoras do XIX concurso de escaparates de Nadal e do III concurso de decoración de Nadal veciñal. En total repartiranse 6.000 euros entre os gañadores/as. No concurso de escaparates entregaranse catro premios dotados cun total de 4.000 euros (1.500 euros para o primeiro, 1.100 para o segundo, 800 para o terceiro e 600 para o cuarto), mentres que no concurso de decoración veciñal repartiranse outros catro premios de 500 euros cada un.

O alcalde, Blas García, e a Subdelegada do Goberno, María Rivas, veñen de presidir a primeira sesión da comisión de seguimento das obras de humanización do Milladoiro, á que tamén asistiron  os concelleiros de Obras e Urbanismo, Gustavo Nieto e Víctor Fernández. Este órgano é resultado da demanda realizada por parte da Alcaldía á Delegación do Goberno o pasado luns 20 de xaneiro.