O Concello de Ames presentou esta mañá  a exposición “Vixando”, unha proposta que mostra pezas das coleccións de arte Afundación e ABANCA, que invitan a recorrer tanto Galicia como o mundo enteiro. A mostra poderá visitarse na praza do Concello ata o vindeiro domingo 24 de setembro. Á inauguración asistiron o alcalde de Ames, Blas García; a técnica do departamento de Cultura, María Vázquez; o coordinador institucional de ABANCA na Coruña, José Manuel Vilariño; a coordinadora adxunta de Cultura de Afundación, Paloma Vela; e a autora dos textos da exposición, Mercedes Rozas; así como Laura Lozano, directora da oficina de ABANCA en Bertamiráns. Participaron tamén diversos membros da Corporación municipal.

A Casa da Cultura de Bertamiráns acolle ata o 26 de decembro unha exposición itinerante do Camiño de Fisterra e Muxía. A mostra pódese visitar en horario de 9.00 a 14.00 horas e de 16.00 a 21.00 horas. Cómpre destacar que o sábado 24 e mailo domingo 25 de decembro a Casa da Cultura de Bertamiráns estará pechada. Tras estar en Ames a mostra continuará a súa itinerancia polos concellos de Cee, Corcubión, Dumbría e Fisterra. O director da mostra, que está organizada por Expogal, é Pepe Barro, deseñador e autor do proxecto Até o Fin. O deseño correu a cargo do arquitecto, Mario Crecente, e as imaxes son do fotógrafo Álvaro Arribi. As persoas que visiten a exposición poderán facer achegas sobre o Camiño na web www.ateofin.gal ou a través do correo electrónico asociacion@ateofin.gal.

A Casa da Cultura do Milladoiro acolle do 13 ao 20 de outubro a exposición fotográfica “100 Lugares Máxicos do Camiño”. A mostra recolle algunhas das instantáneas incluídas no libro homónimo, que será presentado o próximo luns 17 de outubro no Pazo da Peregrina de Bertamiráns, ás 20:00 horas, coa presenza do autor, o fotógrafo Adolfo Enríquez.

A Casa da Cultura de Bertamiráns acolleu hoxe pola mañá a inauguración da exposición Noroeste cuarta Oeste: roteiros de ficción. Trátase dunha mostra enmarcada no proxecto Nortear, que realiza unha singradura a través de temas e obras literarias, cinematográficas, televisivas ou escénicas da nosa contemporaneidade. En modo de navegación polo Atlántico pódese percorrer a ficción galega en diálogo coa do Norte de Portugal. A mostra poderase visitar ata o 30 de xuño na entrada da Casa da Cultura de Bertamiráns.