O pazo de inscrición para o concerto “A landra viaxeira e o amigo lambón” do grupo musical Os Jalochos xa está aberto. Dende este xoves, 4 de xuño, e ata o vindeiro venres 11, as persoas interesadas poderán inscribirse nesta última actividade do primeiro semestre, que estará chea de música e baile e na que se contará a historia de Landra e o seu amigo Lambón na súa viaxe por Galicia nunha folla de Carballo. Neste espectáculo os cativos e cativas poderán cantar e bailar sen acougo, aprender lingua de signos e xogar co ritmo da música. 

Para participar só se precisa enviar un correo electrónico ao enderezo normalizacion@concellodeames.gal no que se indiquen o nome da actividade, nome e apelidos das persoas asistentes, teléfono de contacto e idade dos/as nenos/as que vaian participar. O prazo para anotarse está aberto dende hoxe ata o vindeiro venres 11 de xuño. As prazas asignaranse respectando a orde de recepción das solicitudes, e non se admitirán inscricións fóra do período de inscrición.  

O programa Apego, un vehículo de transmisión da lingua
O programa Apego é un proxecto de dinamización lingüística dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, achegando recursos e unha ampla proposta de actividades lúdicas, creativas e educativas.

As persoas interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario “Súmate ao apego”, que está dispoñible na páxina web do programa, apego.gal.