O auditorio da Casa da Cultura de Bertamiráns acolleu, finalmente, esta edición das Noites en Vela 2025, que contou coas actuacións de As Maianas e Caamaño & Ameixeiras. Este ano contouse con servizo de bus gratuíto para asistir ao evento, que saíu desde O Milladoiro. A actuación de Caamaño & Ameixeiras está subvencionada pola Xunta de Galicia dentro do programa Cultura no Camiño 2025. 

A edición deste ano das “Noites en Vela” celebrarase finalmente este sábado, 30 de agosto, no auditorio da Casa da Cultura de Bertamiráns. Debido á previsión meteorolóxica, que apunta choiva para o sábado, os Concellos de Ames e Negreira decidiron cambiar a localización dos concertos para que se celebren nun espazo cuberto. Esta iniciativa xa estaba prevista inicialmente para o sábado 19 de xullo, pero houbo que cambiar de data debido á previsión de choiva para ese día. Nas “Noites en Vela 2025” actuarán As Maianas e Caamaño & Ameixeiras. Haberá servizo de autobús gratuíto dende O Milladoiro. A actuación de Caamaño & Ameixeiras está subvencionada pola Xunta de Galicia dentro do programa Cultura no Camiño 2025. A entrada é de balde ata completar aforo.

O Concello de Ames reprogramou a actuación da orquestra Olympus para o venres 19 de setembro. Dita actuación, que se enmarca na programación do Ames en Festas 2025, estaba prevista para o martes 5 de agosto como peche das festas da Madalena, pero tivo que ser cancelada por motivos meteorolóxicos (fortes refachos de vento) ao non garantir a seguridade dos asistentes e do equipo da propia orquestra. Finalmente, a actuación da orquestra Olympus farase o 19 de setembro como festa de final de verán, no aparcadoiro do SuperCor, en horario de 21.00 a 00.00 horas.

Este xoves, 14 de agosto, volven os “Seráns de Ames”, desta volta, coa estrea da parroquia de Trasmonte dentro do programa. A partir das 20.00 horas, o campo da festa de Trasmonte acollerá a actuación de Pablo Balseiro & Los Cascarillas, unha proposta musical dirixida a todos os públicos. Ademais, esta actuación dará comezo ás tradicionais festas da parroquia, que se desenvolverán esta fin de semana, os días 15 e 16 de agosto.