Esta mañá tivo lugar no auditorio da Casa da Cultura de Bertamiráns a presentación da XX Festival internacional de Maxia de Ames “FestiMax”, unha das actividades que máis éxito teñen entre a veciñanza amesá. Na celebración do seu vixésimo aniversario, terá lugar do 23 ao 26 de outubro nas Casas da Cultura de Bertamiráns e do Milladoiro. A presentación correu a cargo do concelleiro de Cultura e alcalde de Ames, Blas García; do director artístico do festival, mago e produtor de Abarajar Producciones, Dani Polo; e da técnica do departamento de Cultura, María Vázquez. 

O concelleiro de Cultura e alcalde de Ames, Blas García, subliñou, “buscamos actividades e espectáculos coas que o público participe activamente e se interese polo mundo da maxia. Queremos continuar a traballar nesta liña e, tras 20 anos deste festival, hai que poñer en valor a visión que tivo o primeiro concelleiro de Cultura que puxo en marcha unha iniciativa pioneira e atrevida e que, a día de hoxe, é dos máis consolidades en Galicia”. 

Pola súa banda, a técnica do departamento de Cultura, María Vázquez, explicou que “a programación desta vixésima edición, que amplia o festival un día máis e comezará o xoves, inclúe os obradoiros de maxia e tamén volveremos a ter o Baúl de Maxia, que se estreou o ano pasado e funcionou moi ben. Por outro lado, volvemos a ter unha actividade que funcionou moi ben na súa estrea o ano pasado como é a maxia para os nosos maiores, nos locais de JUPEMI no Milladoiro, e aquí no local dos maiores en Bertamiráns. Pecharemos, como é habitual, coa Gran Gala Máxica, que está creando moitísima expectación”. 

Así, o director artístico do festival, Dani Polo, destacou que “chegamos aos 20 anos do FestiMax, sendo un dos festivais máis lonxevos de Galicia e, este ano, chegamos con varias novidades. Continuamos a traballar por ampliar e mellorar cada día edición, pero mantendo sempre a esencia coa que naceu, que é achegar a maxia a tódolos públicos. O noso obxectivo é ter un programa completo, con actividades dirixidas tanto á cativada como aos maiores e tamén poder gozar de actuacións nos auditorios e propostas no exterior”. 

Maxia para todos os públicos
A programación do FestiMax deste ano está composto por cinco grandes espectáculos que se van a realizar do 23 ao 26 de outubro. A primeira das actividades do programa será “O Baúl da Maxia”, que contará cunha sesión en na Praza de Chavián, en Bertamiráns, o xoves 23, e no aparcadoiro da Casa da Cultura do Milladoiro o venres 24- Esta proposta de pases de maxia, con media hora de duración e con grupos reducidos de 20 persoas, correrá a cargo da maga arxentina Lore Lavand, que adoita mesturar a poesía co mundo da maxia, na súa caravana máxica, un dos teatros máis pequenos do mundo. O  horario da actividade será de 17.30 a 20.00 horas e o acceso será de balde, por orde de chegada. 

Unha das novidades desta edición celebrarase na primeira xornada do festival, o espectáculo “Imposible?!” do galego Mago Rafa. A proposta, cun selo moi persoal, está dirixida para un público familiar, terá lugar ás 18.00 horas, o xoves 23, no auditorio da Casa da Cultura do Milladoiro. As entradas poden adquirirse na Billeteira.

A xornada do venres 24 estará dedicada aos nosos maiores, con dúas sesións de maxia dirixidas especialmente para eles a cargo do mago Román García, tamén de orixe galega e que adoita caracterizarse por crear espectáculos moi creativos e participativos. Deste xeito, ás 11.00 horas desenvolverase o pase no Local dos Maiores de Bertamiráns, mentres que pola tarde, ás 17.00 horas, será a quenda no Milladoiro, no Local de JUPEMI. 

Obradoiros de maxia
Outra das actividades que se realizan de novo este ano serán os obradoiros de maxia, que gozan dunha gran acollida e están dirixidos a rapaces e rapazas de entre 8 e 14 anos. Nesta ocasión, Román García será o encargado de impartir os talleres nos que ensinará aos máis cativos os trucos máis interesantes da maxia. Deste xeito, o sábado 25 de outubro, será a quenda na Casa da Cultura do Milladoiro. Formaranse dous grupos de 12 participantes cada un. A primeira sesión farase ás 11:00h e a segunda a continuación, ás 12:00 horas.

O domingo 26 este mesmo obradoiro impartirase na Casa da Cultura de Bertamiráns. Tamén será impartido por Román García en dúas sesións, ás 11:00 e ás 12:00 horas, e formaranse dous grupos con 12 nenos/as en cada un.

Para participar é necesario inscribirse enviando un correo electrónico ao enderezo cultura@concellodeames.gal poñendo o nome, apelidos da persoa que quere participar no obradoiro de maxia e un número de teléfono de contacto.

Gala máxica internacional
A Gala máxica internacional desta vixésima edición terá lugar o sábado 25 e o domingo 26 de outubro. Como nos últimos anos, haberá catro pases debido á gran demanda e interese que ten este espectáculo entre a veciñanza amesá. A Gala estará presentada polo mago e monologuista catalán Isaac Jurado. 

Nesta ocasión, participarán os magos Seimei, de Corea do Sur e será a primeira vez que actúe en Europa presentando a súa proposta na que os elementos orientais son os protagonistas; Marcos Waldemar, mago galego emerxente que foi galardoado no último Congreso Nacional de Maxia e que estará a presentar unha proposta moi interesante; Peio Rivas, de Vitoria e experto na maxia de manipulación de obxectos, unha das ramas máis complicadas do ilusionismo; e Diego & Elena, dous artistas de Madrid e que presentan un espectáculo no que fusionan as acrobacias aéreas coa maxia.

A venda de entradas farase a través da Billeteira electrónica. Para máis información pódese chamar aos números de teléfono 981 535 940 / 662 377 444 ou escribir un correo electrónico ao enderezo cultura@concellodeames.gal.

Novas relacionadas: 

La Voz de Galicia: "Ames celebra los veinte años de éxitos del FestiMax"

El Correo Gallego: "Ames subirá o pano do seu Festival Internacional de Maxia do 23 ao 26"

Diario de Santiago: "Ames celebra este 2025 as dúas décadas do seu Festival Internacional de Maxia, FestiMax"