O vindeiro sábado, 18 de xullo, a partir das 21:00 horas, celebrarase unha nova edición das “Noites en Vela”, un evento que xa é toda unha tradición e que vincula anualmente aos concellos de Ames e Negreira dende o 2016, e que só puido interromper a pandemia durante as edicións do 2020 e 2021. Este ano os grupos encargados de amenizar a noite serán o cuarteto Balteira e mailo grupo de gaitas amesán da Asociación Cultural Follas Novas. Ademais, haberá un espectáculo pirotécnico que poñerá o punto final á velada. O acceso ao evento é de balde. A actuación de Balteira está subvencionada pola Xunta de Galicia dentro do programa Cultura no Camiño 2026. Haberá un servizo de autobús gratuíto que percorrerá O Milladoiro, Bugallido, Agro do Muíño e Bertamiráns.

Escena Galega recoñece na cuarta edición dos seus Recoñecementos das Artes Escénicas a sete persoas, colectivos e entidades que representan ámbitos esenciais para a creación, a exhibición, a técnica, a xestión cultural e o desenvolvemento do sector escénico galego. A asociación distinguiu o labor de profesionais, entidades e proxectos fundamentais para o desenvolvemento e fortalecemento das artes escénicas galegas. Fíxoo nunha festa de verán no Pazo da Peregrina presentada pola bailarina, coreógrafa e socia Marta Alonso Tejada. Ao acto asistiron o alcalde e concelleiro de Cultura, Blas García, acompañado de concelleiros/as do Goberno municipal, do Partido Popular e do BNG.

O vindeiro mércores, 8 de xullo, o concello de Ames acollerá a xornada inaugural do Festival Internacional de Danza e Movemento “Abanea”, organizado pola asociación IS.MO Cultura. Do 8 ao 12 de xullo desenvolveranse diversas actividades arredor da danza e do movemento, co obxectivo de impulsar esta disciplina entre a veciñanza. A programación do festival foi presentada hoxe na Cidade da Cultura, en Santiago de Compostela. En representación do Concello de Ames acudiu a concelleira de Promoción Económica, Ana Belén Paz. O acto incluíu unha breve actuación en directo a cargo do bailarín Martín Blanco coa peza Máis.

A asociación Escena Galega celebrará o vindeiro martes, 30 de xuño, a gala de entrega dos IV Recoñecementos de Escena Galega das Artes Escénicas. Pensada como unha festa de verán con aperitivo e música, a presentadora será a socia Marta Alonso Tejada, quen ademais ofrecerá unha pinchada musical. A cita será a partir das 22.00 horas no Pazo da Peregrina de Ames. Esta actividade de Escena Galega conta co apoio da Xunta de Galicia, a través da Axencia Galega das Industrias Culturais, e do Concello de Ames.