A veciñanza de Bugallido e numerosos visitantes déronse cita en Ames para participar nunha completa fin de semana festiva que serviu para exaltar a identidade da parroquia. Tras superar a incerteza meteorolóxica das primeiras horas, as xornadas transcorreron cunha magnífica acollida de público. A proposta cultural e lúdica consolidou a Carballeira e o San Isidro como dúas propostas ideais para o intercambio interxeracional, facilitando a transmisión de valores patrimoniais e lingüísticos no ámbito rural. 

O Pazo da Peregrina de Bertamiráns acolleu este venres, 8 de maio, ás 20.00 horas, a inauguración da exposición pictórica “Arquitecturas Internas”, da artista galega Silvia G. Armesto. Unha mostra na que se recollen os últimos traballos da pintora realizados en pastel, óleo e acuarelas. A exposición, que comezou o pasado luns 4 de maio, estará aberta ao público ata o vindeiro venres 15 deste mes. No acto de inauguración participaron o alcalde, Blas García, e concelleiros/as do Goberno municipal.

O pasado xoves 23 de abril finalizou unha nova edición do ciclo Abril de Cine, unha iniciativa enmarcada dentro da programación deseñada polo departamento de Cultura do Concello de Ames e que ten como obxectivo achegar á veciñanza o cinema de actualidade. Este ano proxectáronse “Rondallas”, de Daniel Sánchez Arévalo; “Romería”, de Carla Simón e a aclamada “Sirât”, de Óliver Laxe. A estas tres sesións achegáronse un total de 376 persoas, superando, outro ano máis, as cifras da edición anterior.

O alcalde e concelleiro de Cultura, Blas García,xunto a outros/as concelleiros e concelleiras do grupo de goberno e dos grupos municipais do Partido Popular e do BNG, realizáronlle este pasado mércores pola tarde unha recepción institucional aos actores, actrices e persoal das compañías que foron premiados/as e nominados/as nos XXX Premios de Teatro María Casares. A través de dito recibimento, realizado no salón de plenos da Casa do Concello, púxose en valor o talento e calidade artística amesá no eido cultural. En dito acto púxose de manifesto a necesidade de contar cun novo auditorio acorde ao tamaño e o crecemento que Ames experimentou nos últimos anos.