A Corporación municipal aprobou por unanimidade, no pleno ordinario de setembro, a Conta Xeral de 2022. O Concello de Ames pechou o exercicio 2022 cun resultado orzamentario axustado de 838.056,53 euros e un remanente de tesourería de 8.042.107,22 euros, acadando unhas cifras de execución máximas no tocante aos gastos de 30.668.622,43 euros de obrigas recoñecidas, na que destaca unha cifra de execución de investimentos (capítulo 6) do Concello por importe de 5.664.899,25 euros e unhas cifras de ingresos que acadaron os 29.535.742,64 euros. Tamén se aprobou a modificación do Regulamento da Política de Seguridade da Información, a rectificación do inventario municipal e unha moción, presentada polo BNG, en apoio da realización dunha senda peonil en varios tramos do Camiño de Santiago na parroquia de Trasmonte. Por último, rexeitouse unha moción do grupo municipal popular contra a tramitación dunha Lei de amnistía. Podes ver a gravación do pleno na canle de Youtube do Concello de Ames.

Este xoves, 8 de setembro, celebrouse o pleno ordinario correspondente ao mes de agosto. En dita sesión plenaria a Corporación municipal aprobou por unanimidade todos os puntos recollidos na orde do día. Deste xeito aprobouse a Conta Xeral, que se pechou cun resultado orzamentario axustado de 1.750.000 euros e un remanente de tesourería de 9.366.000 euros. Ademais, a Corporación municipal aprobou a ratificación do decreto de cambio de responsable do contrato do servizo de limpeza viaria e xestión do Punto Limpo; o proxecto modificado de melloras básicas nas condicións térmicas e acústicas no pavillón do Milladoiro; os festivos locais para 2023; e maila prórroga do convenio para a asunción pola Administración xeral da Comunidade Autónoma de Galicia da convocatoria e desenvolvemento dos procesos selectivos unitarios para o acceso ás diferentes categorías dos corpos de policía local e ás prazas de auxiliares de policía local ou ás prazas de vixiantes municipais.

Cos votos a favor de todos os membros da corporación municipal aprobouse onte a creación dos Consellos Sectoriais de Cultura e Educación. Tamén por unanimidade se aprobou a modificación  do proxecto técnico de acondicionamento e mellora da cuberta e das fachadas da EIM O Bosque e a adhesión o programa de Teleasistencia Domiciliaria da Deputación da Coruña. A orde do día incluía ademais unha proposta do PP para instar ao Goberno de España a poñer en marcha medidas para rebaixar o prezo da luz que foi rexeitada ao votaren en contra os concelleiros de Contigo Podemos, PSOE e Ames Novo; unha proposta do BNG sobe a transferencia da AP9 a Galicia que se aprobou coa abstención do grupo Socialista; e outra do grupo Mixto, presentada polo concelleiro de Ciudadanos, Ramon Oulego, que instaba á Xunta a que fixese estudos para instalar filtros HEPA nas aulas, que foi rexeitada cos votos en contra de PP, PSOE, BNG e Contigo Podemos e a abstención do concelleiro de Ames Novo. A proposta presentada conxuntamente polo grupo de Goberno e o grupo Mixto a través da que se insta á Xunta de Galicia a dar cumprimento ao Plan Hidrolóxico Galicia Costa 2015-2021, e acometer, á máxima brevidade posible, as actuacións necesarias para a ampliación e mellora da depuradora de Sisalde, votouse ás 24:00 horas en punto, logo de que o alcalde de Ames, José Miñones, advertise aos concelleiros Ramón Argibay do Partido Popular e Blas García do PSOE sobre a falta de respecto que supuña que duplicasen o tempo permitido na exposición dos seus argumentos. A proposta saíu adiante cos votos a favor de toda a corporación, agás o PP que se abstivo. Por falta de tempo, quedou sen tratar a declaración institucional, proposta polo concelleiro do grupo mixto José Ramón Oulego, para garantir a máxima transparencia e cumprimento do protocolo de vacinación e asegurar o cese dos políticos que se salten ou cometan calquera tipo de irregularidade asociada ao proceso ou a orde de vacinación. O pleno foi retransmitido vía streaming a través da páxina de directo da web municipal. 

A derrogación da ordenanza fiscal de instalación de postos no mercado de rúa foi aprobada por unanimidade no pleno ordinario que se celebrou onte na Casa do Concello. Tamén por unanimidade foron aprobados o resto dos puntos que compuñan a orde de día, agás a moción do BNG sobre a reactivación da asistencia sanitaria e as mocións presentadas por vía de urxencia sobre as medidas de axuda para evitar a quebra dos establecementos (Ames Novo) e as referidas á defensa da orde constitucional e á ocupación ilegal de vivendas (PP). Estas mocións, que saíron adiante con discrepancia de voto, foron os únicos puntos que suscitaron debate e esgotaron todos os tempos de exposición e réplica marcados pola normativa do pleno.