O Concello de Ames recibiu esta semana a notificación da Xunta de Galicia de que o vindeiro mércores, 23 de decembro, entran en funcionamento as novas liñas incluídas no novo contrato de transporte metropolitano que vén de asinar a Consellería de Infraestruturas. Estas melloras son froito das alegacións presentadas polo Concello de Ames no pasado mes de agosto de 2019 ao anteproxecto de explotación de servizos públicos de transporte regular de viaxeiros de uso xeral por estradas. A ampliación de servizos afectan a distintas rutas: incremento do horario de prestación dos servizos na primeira e/ou última hora en certas liñas; aumento dos servizos en fin de semana; implantación de novas expedicións en certas franxas horarias; inversión no sentido dunha liña, para adaptar mellor ás necesidades das persoas usuarias á primeira e última expedición do día, e creación dunha liña de Noitebús que conecte Bertamiráns e O Milladoiro con Santiago. Ademais, o Concello de Ames está inmerso na elaboración do Plan de Mobilidade Urbano Saudable e Sostible (PMUSS).

O Concello de Ames está traballando na redacción do Plan de Mobilidade Urbana Sostible (PMUS). Unha das partes fundamentais para a elaboración do PMUS é a participación cidadá. Para iso vén de publicarse na web http://www.pmusames.gal/ unha enquisa sobre os hábitos de mobilidade da veciñanza de Ames. A través da web do PMUS infórmase das accións relacionadas coa elaboración e participación do Plan de Mobilidade. Tamén haberá sesións de participación, a través dos diferentes colectivos relacionados coa mobilidade, e pódese enviar comentarios e suxestións ao enderezo de correo electrónico: pmusames@gmail.com. Esta actuación forma parte do programa de mellora integral da mobilidade e a conectividade por transporte público, recollido na EDUSI Impulsa Ames.

O Concello de Ames, a través da Concellaría de Mobilidade, pon en marcha unha campaña para informar dos horarios e liñas do transporte metropolitano. En cada marquesiña do concello pódese atopar información detallada sobre os horarios e as liñas que pasan por dita parada. O obxectivo é ofrecerlle á veciñanza unha información precisa e útil. Estes horarios estarán colocados de xeito provisional durante un mes coa finalidade de detectar posibles erros. Unha vez pasado dito período colocarase a información definitiva. Solicítase a colaboración veciñal para detectar posibles erros na información provisional que está colocada nas marquesiñas. Ademais, a través de dita campaña preténdese fomentar a utilización do transporte público. Segundo se indica na campaña: Viaxar en autobús é cómodo, sostible e seguro.

O Concello de Ames, a través da Concellaría de Mobilidade, organizou unha programación específica para conmemorar a II Semana Europea da Mobilidade. Ditas actividades desenvolveranse en Ames do 16 ao 22 de setembro. O programa comeza coa charla “Querémoste seguro”, que está dirixida ás persoas maiores. Ademais, durante a próxima fin de semana haberá unha marcha ciclista nocturna; actividades e xogos populares en bici; e unha andaina pola senda O Milladoiro – Bertamiráns. Para participar nesta actividades é necesario inscribirse previamente. Ademais, no marco do fomento da mobilidade sen emisións, presentouse a campaña “A 30 Ames é máis! Trátase dunha campaña de sensibilización sobre a importancia da velocidade a 30 km/h no interior das zonas urbanas de Ames.