[13-11-2018] A oficina municipal de información xuvenil (OMIX) organiza para os meses de novembro e decembro un curso de dinamización de eventos infantís e o ciclo formativo “Máis que 2.0”. Este ciclo está composto por un curso de marca persoal e outro de marketing dixital, ambos destinados a maiores de 16 anos. Para participar en calquera dos tres cursos é necesario enviar a ficha de inscrición cuberta e unha fotocopia do DNI ao enderezo de correo electrónico omix@concellodeames.gal antes do 13 de novembro.

[12-11-2018] Unha representación da Corporación municipal de Ames mantivo esta mañá unha xuntanza en Madrid co Director xeral de Estradas do Ministerio de Fomento, Javier Herrero Lizano. A reunión serviu para dar traslado da situación actual da N-550 ao seu paso polo Milladoiro e estudar a posibilidade de desenvolver medidas a curto prazo para paliar o elevado tránsito de vehículos pola avenida Rosalía de Castro. Neste senso, estudarase a posibilidade de limitar tamén o paso polo centro urbano de vehículos pesados de menos de 30 toneladas, ademais de instalar unha serie de paneis informativos que indiquen o tempo de percorrido tanto pola N-550 como por vías alternativas, o que se prevé disuada aos condutores do seu paso polo centro do Milladoiro.

[12-11-2018] A Concellaría de Educación e Cultura ten programados para este mes de novembro unha serie de contacontos, que se desenvolverán nas bibliotecas municipais do Milladoiro e Bertamiráns, e nos centros sociais de Bugallido e Augapesada. Ao longo deste mes, haberá dúas sesións en cada bibilioteca, e unha nos locais sociais, dirixidas especialmente a nenas e nenos entre os 3 e os 8 anos. A entrada é libre e gratuíta.

[10-11-2018] O Concello de Ames, a través da Concellaría de Promoción Económica, e a organización Acción contra a Fame, colaboran na posta en marcha do programa Vives Emprende, correspondente ao segundo semestre deste ano, que asesora, forma e facilita o acceso a financiamento a persoas desempregadas ou con emprego precario que desexen emprender, especialmente a mulleres. As actividades de dito programa proseguen a próxima semana coa realización de dous novos talleres, que abordarán como vender un produto ou servizo a través de Internet e as obrigacións e trámites que xera un negocio na rede. Este nova edición do programa está formada por 10 talleres, dos que quedan por impartir seis obradoiros no que resta de novembro.