[08-11-2018] O Concello de Ames, a través do Servizo de Normalización Lingüística e do departamento de Promoción Económica, crea o Premio Lingua e Empresa co obxectivo de recoñecer de forma pública o uso e fomento do galego na actividade empresarial. Optarán a este galardón todas as empresas, con sede social ou centro de actividade no concello de Ames, que sexan propostas ata o 30 de novembro por calquera persoa ou entidade, ou pola propia empresa que queira participar. Para propoñer a unha empresa para este premio haberá que entregar, ben de forma presencial ou telemática, a ficha de inscrición dispoñible baixo o apartado de descargas desta nova.

[08-11-2018] O Concello de Ames, a través do departamento de Persoal, fai público o decreto polo que se aproba a lista definitiva de admitidos e excluídos do proceso selectivo para a creación dunha bolsa de traballo de mestres/as de saxofón para a Escola Municipal de Música do Concello de Ames. A constitución do tribunal e a fase de baremación terá lugar o día 13 de novembro de 2018. Premendo no enlace que está a túa dereita, baixo o apartado de descargas, poderás obter dito decreto.

[08-11-2018] O Concello de Ames participa, por terceiro ano consecutivo, na campaña En negro contra as violencias, que busca poñer na axenda pública a loita para rematar con todos os tipos de violencia de xénero en vésperas do Día Internacional de Eliminación da Violencia Contra as Mulleres, que se celebra o vindeiro domingo, 25 de novembro. Así, a Concellaría de Servizos Sociais e Igualdade ten programadas varias accións ao abeiro da campaña Ames en Negro, co obxectivo de concienciar sobre esta realidade, e convidar a toda a veciñanza amesá a que se una para mostrar a súa repulsa á violencia machista.

[08-11-2018] O Concello de Ames, en colaboración coa empresa galega Movelco: solucións de mobilidade eléctrica ecolóxica, acaba de instalar dous puntos de recarga para coches eléctricos no municipio amesá, un na praza do Concello, en Bertamiráns, e outro no aparcadoiro da Casa da Cultura do Milladoiro. A iniciativa do goberno municipal aposta por impulsar o uso do vehículo eléctrico, tanto por parte da propia administración como da cidadanía.