[15-11-2018] O Concello de Ames, a través do Servizo de Normalización Lingüística e do departamento de Promoción Económica, crea o Premio Lingua e Empresa co obxectivo de recoñecer de forma pública o uso e fomento do galego na actividade empresarial. Optarán a este galardón todas as empresas, con sede social ou centro de actividade no concello de Ames, que sexan propostas ata o 30 de novembro por calquera persoa ou entidade, ou pola propia empresa que queira participar. Para propoñer a unha empresa para este premio haberá que entregar, ben de forma presencial ou telemática, a ficha de inscrición dispoñible baixo o apartado de descargas.

[14-11-2018] O Concello de Ames informa sobre a convocatoria de axudas para a promoción de actividades levadas a cabo no exercicio 2018 polos clubs e asociacións deportivas de Ames. A contía destinada a esta convocatoria ascende nesta anualidade aos 75.000 euros, sendo o importe individual das achegas concedidas non superior aos 9.000 euros. O prazo de presentación de solicitudes é de 30 días naturais desde a publicación das bases no Boletín Oficial da Provincia (BOP), que tivo lugar o martes, 13 de novembro. O prazo de solicitude estará aberto ata o 14 de decembro. Premendo no enlace que está a túa dereita, baixo o apartado de descargas, poderás obter as bases desta convocatoria.

[14-11-2018] A concelleira de Economía e Facenda e alcaldesa en funcións, Genma Otero, a concelleira de Sanidade, Servizos Sociais e Igualdade, Luísa Feijóo, e o concelleiro de Educación e Cultura, David Santomil, realizaron esta maña unha visita para presentar a vivenda de tránsito de Firmistáns xa lista para a súa posta en funcionamento. Trala rehabilitación, financiada ao abeiro da convocatoria 2017-18 da medida Leader do PDR de Galicia 2014-2020, o edificio convertese nun fogar de tránsito e soporte socio-educativo, que acollerá de xeito temporal a persoas en situación de risco social.

[13-11-2018] A Aula da Natureza acollerá o vindeiro sábado, 17 de novembro, un obradoiro de elaboración de esencias e perfumes. A actividade será dirixida pola enxeñeira técnica agrícola, técnica de xestión medioambiental e consultora internacional para ONU Mulleres, Lidia Rojo. Para participar neste taller, dirixido a maiores de 14 anos, é necesario enviar cuberta a ficha de inscrición dispoñible baixo o apartado de descargas ao enderezo electrónico auladanatureza@concellodeames.gal antes das 14.00h do venres.