Actualidade

Ex., 05-09-2026
Ex., 05-09-2026
Xoves, 22 de novembro de 2018
O Concello de Ames aposta un ano máis pola igualdade e a prevención da violencia de xénero coa celebración das VIII Xornadas Acércate

[22-11-2018] Ao longo do día de hoxe a Casa da Cultura do Milladoiro acolle a oitava edición das Xornadas sobre igualdade e prevención da violencia de xénero, que organiza o Concello de Ames, coa colaboración da Deputación da Coruña, baixo o título “Acércate á igualdade”. A apertura institucional correu a cargo da concelleira de Servizos Sociais e Igualdade, Luísa Feijóo, e da Secretaria Xeral da Igualdade, Susana López Abella. En dito acto tamén estiveron a directora e maila psicóloga do Centro de Información á Muller (CIM) de Ames. Unhas 110 persoas participaron nas mesas de debate e charlas, realizadas pola maña, mentres que nos obradoiros da tarde hai inscritas 142 persoas. Para o peche cóntase coa actuación da compañía de danza Kintsugi.

Xoves, 22 de novembro de 2018
Anuncio do resultado do primeiro e segundo exercicio da fase de oposición do proceso selectivo para a creación dunha bolsa de traballo de mestres/as de saxofón para a Escola Municipal de Música do Concello de Ames

[22-11-2018] O Concello de Ames, a través do departamento de Persoal, fai público o anuncio do resultado dos exercicios da fase de oposición do proceso selectivo para a creación dunha bolsa de traballo de mestres/as de saxofón para a Escola Municipal de Música do Concello de Ames. Establécese un prazo para a presentación de alegacións que vai ata o 23 de novembro (incluído) de 2018 . Premendo no enlace que está a túa dereita, baixo o apartado de descargas, poderás obter os devanditos anuncios.

Xoves, 22 de novembro de 2018
Visita a exposición das obras que optan ao premio do V Certame de Fotografía Comercial-Empresarial de Novo Milladoiro

[22-11-2018] A exposición das obras candidatas aos premios do V Certame de Fotografía Comercial-Empresarial xa pode visitarse na Casa de Cultura do Milladoiro, onde permanecerá aberta ata o 28 de decembro. A gala de entrega de premios celebrarase o 21 de decembro, na que se darán a coñecer os nomes das persoas gañadoras. A temática do concurso xira en torno ao propio parque e a visión da empresa actual.

Xoves, 22 de novembro de 2018
Comeza a terceira edición da campaña Zocos e Trasnos para que ningunha crianza quede sen agasallos este Nadal

[22-11-2018] A Oficina de Voluntariado de Ames e a asociación de veciños Vivo en Ames, xa están á procura de trasnos co obxectivo de que ningún cativo/a quede sen o seu agasallo de Nadal. Así, os trasnos serán persoas voluntarias que queiran achegar un agasallo de Reis a unha nena ou neno cuxa familia estea a atravesar por un momento de dificultades económicas. Quen desexe rexistrarse como trasno poderá facelo chamando á Oficina de Voluntariado de Ames a través do 662 37 70 44, á Asociación Vivo en Ames mediante o 687 05 46 35 ou enviando un correo electrónico ao enderezo zocosetrasnos@gmail.com ou unha mensaxe privada á conta de Facebook do voluntariado ou da propia asociación. O rexistro tamén se pode facer de xeito presencial na Oficina de Voluntariado de Ames, situada na Casa da Cultura de Bertamiráns. Os agasallos non poderán ser de carácter sexista nin bélico.

Xoves, 22 de novembro de 2018
Mañá remata o prazo para inscribirse no conto-obradoiro "Un bico para Alí"

[22-11-2018] Despois do éxito de A casa encantada de Alí, Luís Prego e Fabaloba regresan a Ames o vindeiro sábado, 24 de novembro, para poñernos ao día sobre as aventuras da súa protagonista. O conto-obradoiro Un bico para Alí, encadrado no programa Apego, constará de dúas sesións nas que unha vintena de familias con nenas e nenos de 0 a 6 anos poderán participar nunha chea de xogos, contos e cancións. Para acudir é necesario inscribirse antes do 23 de novembro, mediante o envío dun correo ao enderezo normalizacion@concellodeames.gal, en que apareza o nome e idade dos participantes, un teléfono de contacto e a sesión escollida.

Mércores, 21 de novembro de 2018
Abre o prazo de inscrición para participar no curso de lingua de signos que organiza o Concello de Ames

[21-11-2018] O Concello de Ames, mediante a Concellaría de Sanidade, Servizos Sociais e Igualdade, organiza un curso de lingua de signos española para principiantes, que se impartirá entre os meses de novembro e abril. As inscricións para participar nesta actividade, que é gratuíta, poden realizarse acudindo á Oficina de Servizos Sociais do Milladoiro, ou a través dos teléfonos 981 535 941 ou 981 890 964.

Mércores, 21 de novembro de 2018
O Concello de Ames convida á veciñanza amesá a tinguir de negro a praza do Concello o venres

[21-11-2018] O concello de Ames continúa cos actos de conmemoración do Día Internacional para a Eliminación da Violencia contra as Mulleres, prestándolle especial atención ás xeracións máis novas. Deste xeito, os actos centrais de mañá celebrarónse nos CEIPs A Maía, Barouta e Agro do Muíño, onde se instalaron puntos móbiles de igualdade. Asemade, convidase á veciñanza a participar no acto institucional que terá lugar na Praza do Concello de Bertamiráns o vindeiro venres, no que se lerá un manifesto e se mostrará a repulsa a calquera tipo de violencia de xénero.

Mércores, 21 de novembro de 2018
A partir do 10 de decembro instalaranse as sinais que prohiben a circulación de vehículos pesados con MMA maior a 30 toneladas polo centro do Milladoiro

[21-11-2018] Esta mañá na visita feita á zona das Galanas, a subdelegada do Goberno na Coruña, Pilar López-Rioboo, anuncio que a partir do vindeiro 10 de decembro iniciaranse os traballos para colocar as sinais que prohibirán a circulación de vehículos pesados, con MMA maior a 30 toneladas, pola avenida de Rosalía de Castro, no Milladoiro. Esta medida permitirá desviar uns 250 vehículos pesados ao día cara a autoestrada AG-56. A subdelegada do Goberno estivo acompañada dos alcaldes de Ames, Jose Miñones, e de Teo, Rafael Sisto. Posteriormente, a subdelegada do Goberno e o xefe da Demarcación de Estradas de Galicia, mantiveron unha xuntanza na Casa da Cultura do Milladoiro con representantes da Corporación municipal e da Plataforma veciñal da N550.

Mércores, 21 de novembro de 2018
O Pleno debaterá este xoves en sesión extraordinaria a aprobación dun suplemento de crédito por valor de 414.610 euros

[21-11-2018] Este xoves, 22 de novembro, celebrarase un pleno extraordinario. Previamente, os asuntos que se abordarán en dito pleno foron tratados nas comisións informativas realizadas o pasado venres. En ditas comisións abordáronse a aprobación do suplemento de crédito 3/2018, por valor de 414.610 euros, financiado con baixas por anulación; a revisión ordinaria con Urbaser correspondente ao exercicio 2018; a terceira prórroga polo prazo dun ano do contrato asinado con Urbaser SA; a aprobación do proxecto corrixido para a cubrición do parque infantil da praza de Chavián, en Bertamiráns; e o cambio de periodicidade da rendición de información trimestral ao pleno sobre o estado de execución do Orzamento e dos movementos de tesourería. Premendo no enlace que está a túa dereita, baixo o apartado de descargas, poderás obter a convocatoria coa orde do día do pleno extraordinario do 22 de novembro.

Mércores, 21 de novembro de 2018
A galiña azul de Tanxarina chega a Bertamiráns este venres

[21-11-2018] Este venres, 23 de novembro, a compañía de teatro de títeres Tanxarina representa na Casa de Cultura de Bertamiráns o seu espectáculo A galiña azul. A peza, na que conviven actores e marionetas, é unha adaptación da obra homónima de teatro infantil de Carlos Casares. As entradas para a obra xa se poden retirar na @Billeteira, a través da páxina web do Concello de Ames.