[24-11-2018] O goberno municipal vén de aprobar en Xunta de Goberno Local que o sobrante por baixas de licitación no POS+ 2017, que ascende a 154.148,21 euros, sexa investido no proxecto de cubrición da área de xogos do parque infantil de Agro da Vella, situado no Milladoiro. O Concello de Ames porá 36.245,39 euros, para completar o orzamento total do proxecto que ascende a 190.393,60 euros. Dito sobrante só se pode destinar ao financiamento dos investimentos financeiramente sostibles aprobados no plan complementario POS+ 2018 e non incluídos no POS Adicional 1/2018.

[23-11-2018] A Xunta de Goberno Local aprobou o pasado 15 de novembro as convocatorias de axudas para a promoción de actividades de servizos sociais comunitarios e inclusión social levadas a cabo por entidades de iniciativa social sen ánimo de lucro durante o exercicio de 2018. Hoxe, 23 de novembro, ditas bases saen publicadas no Boletín Oficial da Provincia da Coruña (BOP). O prazo para presentar as solicitudes é dun mes, a contar desde o día seguinte da publicación destas bases no BOP. En caso de terminar nun día inhábil, este prazo entenderase estendido ata o inmediato hábil seguinte. As solicitudes, xunto co resto da documentación, presentarase no Rexistro Electrónico Xeral do Concello de Ames, o na sede electrónica do Concello (https://sede.concellodeames.gal/es/). Igualmente poderá presentarse no Rexistro electrónico do Punto de Acceso Xeral do Estado (REC), ao que se pode acceder desde o enlace dispoñible na sede electrónica do Concello de Ames.

[23-11-2018] O Concello de Ames informa sobre a convocatoria de axudas para a promoción de actividades de servizos sociais comunitarios e inclusión social levadas a cabo por entidades de iniciativa social sen ánimo de lucro durante o exercicio de 2018. A contía destinada a esta convocatoria ascende aos 40.531,73 euros, sendo o importe individual das achegas concedidas non superior aos 7.500 euros por proxecto de actuación, cun máximo de tres proxectos por entidade. O prazo para presentar as solicitudes é dun mes, a contar desde o día seguinte da publicación destas bases no BOP, publicadas o 23 de novembro, no caso de terminar nun día inhábil, este prazo entenderase estendido ata o inmediato hábil seguinte. Premendo no enlace que está a túa dereita, baixo o apartado de descargas, poderás obter as bases desta convocatoria.

[23-11-2018] Este xoves, 22 de novembro, realizouse un pleno extraordinario no que se aprobou por maioría o suplemento de crédito 3/2018, por valor de 414.610 euros, financiado con baixas por anulación, e maila terceira prórroga polo prazo dun ano do contrato asinado con Urbaser SA. Asemade, aprobouse por unanimidade a revisión ordinaria con Urbaser correspondente ao exercicio 2018; o proxecto corrixido para a cubrición do parque infantil da praza de Chavián, en Bertamiráns; e o cambio de periodicidade da rendición de información trimestral ao pleno sobre o estado de execución do Orzamento e dos movementos de tesourería. Os concelleiros e concelleiras da Corporación municipal acudiron ao Pleno coas camisetas da campaña Ames en Negro, que se enmarca dentro das actividades do Día Internacional de Eliminación da Violencia Contra as Mulleres, que se celebra este domingo, 25 de novembro.