[01-11-2017] Este martes, 31 de outubro, rematou o obradoiro de lingua e cultura En galego, co teu acento. Nesta actividade participaron 15 persoas de catro nacionalidades diferentes (Colombia, Venezuela, Cuba e Arxentina). A concelleira de Sanidade, Servizos Sociais e Igualdade , Luísa Feijóo, foi a encargada de entregar os diplomas a todas aquelas persoas participantes que completaron o 90% das horas impartidas. As aulas deste obradoiro desenvolvéronse no Pazo da Peregrina de Bertamiráns ao longo do mes de outubro. O vindeiro xoves, 2 de novembro, este mesmo obradoiro de lingua e cultura galega comezará a impartirse na Casa da Cultura do Milladoiro. Estes obradoiros están organizados pola Concellaría de Normalización Lingüística en colaboración coa Concellaría de Servizos Sociais.

[01-11-2017] A semana pasada realizouse a primeira reunión da Comisión de prevención de incendios que está formada por diferentes técnicos e traballadores/as do Concello de Ames. A composición interdepartamental permite dispor dunha visión xeral dos asuntos a tratar por parte das diferentes áreas, de xeito que a coordinación do plan será moito maior. Os departamentos de medio ambiente, recursos humanos, intervención, contratación, urbanismo e seguridade forman esta comisión que manterá reunións periódicas ao longo do ano.

[31-10-2017] O Concello de Ames imparte este xoves e venres dous cursos de formación para asociacións e entidades locais sobre a presentación de documentación en formato dixital. Estas xornadas xorden como consecuencia da aplicación das leis estatais, polas que todas as entidades e empresas deben entregar a documentación por rexistro en formato dixital. Esta formación tamén permitirá coñecer con detalle os mecanismos habilitados para a solicitude do DNI electrónico ou do certificado dixital, así como a súa utilización no procedemento electrónico do Concello de Ames no portal web. As xornadas formativas impartiranse nas aulas de informática das Casas da Cultura do Milladoiro e Bertamiráns, en horario de 20:00 a 22:00 horas. É preciso inscribirse enviando un correo electrónico ao enderezo cemit.ames@xunta.gal

[31-10-2017] O próximo domingo, 5 de novembro, terá lugar un paseo interpretativo polas Fragas de Agrón, organizado pola Aula da Natureza. O paseo, que terá unha extensión aproximada de dous quilómetros, discorrerá entre os lugares de Gasamáns e Ferreiros. A actividade, que está dirixida a persoas adultas e a menores de idade acompañados, desenvolverase entre as 10:30h e as 14:00 horas. Para participar é preciso anotarse previamente, enviando o formulario de inscrición -que se pode atopar baixo o apartado de descargas desta nova- ao enderezo de correo electrónico auladanatureza@concellodeames.gal. Haberá servizo de autobús, tanto desde o Milladoiro como desde Bertamiráns.