[04-11-2017] A próxima semana comezan as actividades organizados polo Día Internacional da Eliminación da Violencia contra a Muller, que se conmemora cada 25 de novembro. O vindeiro luns, 6 de novembro, unha delegación de 17 Concellos, adheridos á campaña En Negro contra as Violencias, viaxará a Bruxelas, co obxectivo de explicar no Parlamento Europeo as claves desta iniciativa e visibilizar, deste xeito, o pacto municipal social galego contra as violencias machistas. A Concelleira de Sanidade, Servizos Sociais e Igualdade, Luisa Feijóo, será a responsable de representar ao Concello de Ames no Parlamento Europeo.

[03-11-2017] Esta semana, dous dos grupos de terceiro de Primaria do CEP de Ventín realizaron unha pequena excursión. Organizada pola Aula da Natureza, a saída consistiu na realización do camiño histórico ambiental que vai desde Augapesada á Ponte Maceira. Ao longo do traxecto, fíxose especial fincapé nos aspectos naturais da ruta, sen deixar de lado referencias de carácter histórico como a da batalla na zona de Carballo, en Trasmonte, pola posesión das Torres de Altamira.

[03-11-2017] O departamento de Persoal fai público o anuncio co resultados da fase de concurso do proceso selectivo para a selección e contratación de dous/dúas peóns para a brigada de xestión e repoboación forestal do Concello de Ames. Convócase aos aspirantes á realización do exercicio da fase de oposición, que terá lugar o vindeiro 6 de novembro de 2017, ás 11:30 horas, no Centro de Formación de Aldea Nova. Os aspirantes deberán estar neste lugar ás 11:15h co DNI e un bolígrafo. Premendo no enlace que está a túa dereita, baixo o apartado de descargas, poderás obter o devandito anuncio.

[02-11-2017] O vindeiro venres, 3 de novembro, a Casa da Cultura do Milladoiro acollerá, ás 21:00 horas, a representación da obra Shakespeare para todos, do grupo teatral da asociación Andaina Pro Saúde Mental. A peza, que se encadra dentro da XII Mostra de Teatro Afeccionado de Ames, é unha adaptación libre de dous textos do dramaturgo inglés: Romeo Xulieta e O Mercader de Venecia. A primeira representación da mostra tivo lugar o pasado 20 de outubro. Os vindeiros 10 e 17 de novembro haberá dúas funcións máis. A entrada é sempre libre e gratuíta. A Mostra de Teatro Afeccionado está organizada polo Concello de Ames, a través da Concellaría de Educación e Cultura.