[30-10-2017] O alumnado de sexto de Primaria do CEP de Ventín tivo a oportunidade de asistir este luns, 30 de octubro, a representación do espectáculo clown O Valo, creado por Pallasos en Rebeldía para o Fondo Galego de Cooperación e Solidariedade. A representación, que se encadra dentro da conmemoración do Día Mundial das Persoas Refuxiadas – fixado pola Organización das Nacións Unidas (ONU) o 21 de xuño -, busca promover unha reflexión sobre as fronteiras e a situación das persoas refuxiadas.

[30-10-2017] O Concello de Ames está reordenando e mellorando as áreas de estacionamento que están situadas nos núcleos urbanos de Bertamiráns e do Milladoiro. As últimas actuacións realizadas foron a pavimentación e pintado do aparcadoiro que se atopa ao carón da rúa Alcalde Lorenzo. Ademais, neste mesmo lugar habilitouse unha nova área de estacionamento con máis de 150 prazas, despois de chegar a un acordo cos propietarios dunha parcela de 4.400 metros cadrados. No Milladoiro executáronse unhas escaleiras que unen o polígono do Novo Milladoiro co aparcadoiro do campo de fútbol para que poida ser usado polas persoas que traballan neste parque empresarial. Tamén se mellorou a seguridade viaria na rúa do Muíño Vello.

[28-10-2017] O Concello de Ames vén de ampliar o número de grupos das actividades de patinaxe, ximnasia de mantemento, ximnasia rítmica, spinning e xadrez. A ampliación débese ao aumento progresivo, ano tras ano, do número de inscricións nas Escolas, que alcanzou este curso as 2.347. Neste novo curso, están a ser empregadas nove instalacións deportivas diferentes: os dous pavillóns municipais, os dous dos CEIP de Barouta e o CEIP Agro do Muíño, as dependencias dos IES de Bertamiráns e do Milladoiro, o anexo da Casa da Cultura de Bertamiráns, os locais sociais de Biduído, Agrón e Tapia e a sala do espazo de usos múltiples de Aldea Nova. Ademais, está contemplada a construción de novas instalacións deportivas anexas aos dous pavillóns municipais. O goberno municipal de Ames materializa, deste xeito, a súa aposta polo práctica deportiva e os hábitos de vida saudables.

[27-10-2017] O Concello de Ames, a través da Concellaría de Servizos Sociais, informa de que este xoves, 26 de outubro, saíu publicada, no Boletín Oficial da Provincia (BOP), a convocatoria de axudas destinadas ao apoio económico das familias numerosas do municipio. A contía total destinada a estas axudas é de 120.000 euros, sendo de 1.200€ o máximo do importe individual concedido a cada unidade familiar. Con esta iniciativa, o goberno municipal pretende axudar a aquelas familias que máis dificultades económicas teñan para a crianza das súas fillas e fillos. As persoas interesadas poderán presentar as solicitudes no Rexistro Xeral do Concello ata o vindeiro 27 de novembro. Para obter máis información pódese chamar aos números de teléfono 981 535 941 e 981 890 964.