[08-11-2017] O venres, 10 de novembro, a Casa da Cultura do Milladoiro acollerá, ás 21:00 horas, a representación da obra “O medo meu”, do grupo Catre Teatro da asociación cultural Alende, das Pontes de García Rodríguez. A peza, que se encadra dentro da XII Mostra de Teatro Afeccionado de Ames, é unha traxicomedia que xira arredor das persoas e dos seus medos. O vindeiro 17 de novembro, terá lugar a última das representacións da Mostra: O Enmeigado, do grupo municipal de teatro de Ames. A XII Mostra de Teatro Afeccionado está organizada polo Concello de Ames, a través da Concellaría de Educación e Cultura.

[07-11-2017] O departamento de Persoal fai público o resultado do primeiro exame de oposición do proceso selectivo para a contratación de dous peóns, para a brigada de xestión e repoboación forestal do Concello de Ames. O prazo de reclamacións remata o 9 de novembro.

[07-11-2017] O Pazo da Peregrina acolleu o pasado venres, 3 de novembro, unha nova Foliada con Apego. Ao longo da tarde houbo bailes en rolda, xogos de ritmo, palmas, gaitas, pandeiretas e moitas cantigas populares. A actividade, que estivo dirixida a familias con crianzas sen límite de idade e, en xeral, a calquera persoa á que lle gustase a música tradicional, contou cunha elevada participación. A programación do Apego continúa o vindeiro sábado, 11 de novembro, co obradoiro Poesía para tirar o medo, no cal a escritora María Canosa achegará fórmulas para superar os medos das cativas e cativos.

[07-11-2017] O vindeiro xoves, 9 de novembro, terá lugar o seguinte dos obradoiros encadrados dentro do programa Vives Emprende, organizado polo Concello de Ames, a través da Concellaría de Promoción Económica e en colaboración coa ONG Acción contra a Fame. Centrado no marketing e nos estudos de mercado, o obradoiro desenvolverase no Centro de Formación e Emprego do Concello, en Aldea Nova, entre as 16:00h e as 20:00 horas. As persoas interesadas pódense inscribir no obradoiro, chamando ao número de teléfono do departamento de Promoción Económica, ao 981 883 002, ao número da propia asociación, ao 689 869 465, ou enviando un correo electrónico ao enderezo mlloves@accioncontraelhambre.org. Tamén é posible inscribirse a través do seguinte formulario https://goo.gl/Efb14L