[10-11-2017] Este venres, 10 de novembro, sae publicado no Boletín Oficial da Provincia (BOP) o anuncio de licitación de concesión de nichos, tumbas, panteóns e columbarios do cemiterio municipal de Ames, que está situado no lugar de Os Batáns. O goberno municipal puxo en marcha unha campaña para informar á veciñanza de que dispón un prazo de 20 días naturais para presentar as súas solicitudes. Dito prazo rematará o día 30 de novembro (inclusive). As ofertas deberán presentarse, nalgún dos rexistros municipais, en dous sobres pechados (A e B) coa documentación que se indica no prego de condicións que rexen o proceso de licitación. Premendo nos enlaces que están a túa dereita, baixo o apartado de descargas, poderás obter a documentación necesaria para participar na licitación.

[10-11-2017] O pasado xoves, 9 de novembro, celebrouse o acto de conmemoración dos vinte anos de andaina do Fondo Galego de Cooperación e Solidariedade, entidade da que é socio o Concello de Ames. A concelleira de Servizos Sociais e Igualdade, Luísa Feijóo, asistiu á celebración acompañada polo técnico municipal de Servizos Sociais, Leo Pena, e pola técnica de Turismo, Sonia Moure, quen participou, no 2016, no programa Vacación con Traballo en Cabo Verde. O evento, que combinou a reivindicación da loita contra a pobreza e a defensa dos dereitos humanos con diferentes actividades de carácter lúdico, tivo lugar na Cidade da Cultura, no auditorio Xosé Neira Vilas, a partir das 11:00 horas.

[09-11-2017] Este venres, 10 de novembro, o Milladoiro acollerá o seu tradicional Castañazo, o magosto organizado por un grupo de familias con crianzas escolarizadas no CEP de Ventín, co apoio da ANPA As Brañas e a colaboración do Concello de Ames. Ao longo da tarde haberá, ademais de castañas, chourizos e doces, cantina con bebidas quentes, xogos tradicionais e música, así como un sorteo dunha PS4 e outros premios. O magosto celebrarase a partir das 17:30 horas, na praza Manuel Murguía.

[09-11-2017] O goberno municipal presentou este xoves, 9 de novembro, no local social de JUPEMI, ante un grupo de 40 veciños/as, o proxecto técnico de arranxo da urbanización do PM5-03 do Milladoiro. Deste xeito, trátase de regularizar a situación irregular dunhas 200 vivendas que se atopan entre as rúas Figueiras e da Moa e entre a avenida de Rosalía de Castro e a a rúa Costa Grande. A arquitecta municipal, Marta Bellas, e mailo arquitecto que redactou o proxecto de obras que se van a executar, David Fernández, explicáronlle aos veciños/as afectados/as os traballos que se fan a realizar.