[14-12-2018] O Concello de Ames informa que dende o Grupo Naturgy comunican que co fin de efectuar traballos de mantemento e desenvolvemento na rede eléctrica necesarios para poder atender nas mellores condicións as necesidades de subministro da zona, vaise a realizar un corte na rede eléctrica o venres, 21 de decembro, de 0.00 a 3.00 horas. Deste xeito, quedarán fora de servizo varias instalacións da Avenida da Maía, en Bertamiráns, da estrada de Lapido e do paraxe do Porto. Premendo no enlace que está a túa dereita, baixo o apartado de descargas, poderás obter o aviso completo.

[14-12-2018] A Corporación municipal aprobou por unanimidade, en sesión plenaria extraordinaria, a Conta Xeral de 2017 cun resultado orzamentario axustado con superávit de 2.650.775,06 euros, un remanente de tesourería de 4.873.854,56 euros e con débeda bancaria 0 euros, cumprindo así os obxectivos de estabilidade orzamentaria, gasto e débeda pública. A concelleira de Economía e Facenda, Genma Otero, foi a encargada de dar traslado ao Pleno da liquidación orzamentaria de 2017, en función dos gastos, ingresos e resultado orzamentario do exercicio, nunha sesión plenaria que se prolongou por espazo dunha hora.

[14-12-2018] Os/as integrantes da asociación Arcea – Adames, acompañados das súas monitoras, Natalia e Cristina; da concelleira de Sanidade, Servizos Sociais e Igualdade, Luísa Feijóo; do técnico municipal, Leonardo Pena; e da educadora familiar municipal, María José Gallardo; estiveron esta mañá nas Casas da Cultura de Bertamiráns e do Milladoiro, para decorar as árbores de Nadal colocadas en ditas instalacións.

[13-12-2018] O Nadal chega á Aula da Natureza este sábado, 15 de decembro, coa realización de dous obradoiros de decoración e un taller de cociña. Pola mañá, nenas e nenos de 6 a 12 anos modelarán un moucho con arxila no edificio da Aula da Natureza, mentres que pola tarde chegaralle a quenda aos adultos, que realizarán varios adornos orientados á decoración dunha mesa de Nadal. Ese mesmo día realizarase un obradoiro sobre a elaboración dun buffet de festa no Pazo da Peregrina.