Actualidade
Luns, 23 de xaneiro de 2023
O departamento de Bibliotecas do Concello de Ames, dependente da Concellaría de Cultura e Tecnoloxías da Comunicación, presentou cinco novas propostas de animación á lectura entre o público infantil para o primeiro semestre deste ano 2023. Trátase de sesións de contacontos, que, como habitualmente, terán lugar tanto na biblioteca de Bertamiráns como na do Milladoiro, e que están enfocadas á cativada de entre 3 e 8 anos. A programación ao completo pode consultarse premendo nesta ligazón.
Martes, 17 de xaneiro de 2023
Este mércores, 18 de xaneiro, celébrase o primeiro dos encontros literarios do ano 2023 organizados polas bibliotecas municipais de Ames. Nesta ocasión, o Pazo da Peregrina acollerá a Patricia de Lorenzo, que presentará “Chévere: trinta e cinco anos de axitación cultural”, unha obra editada por Kalandraka. O evento terá lugar ás 20:00 horas, e contará tamén coa presenza de Miguel de Lira e de Xesús Ron, tamén compoñentes do grupo teatral que titula o libro; de Marta Vega Lorenzo, espectadora de Chévere; así como da concelleira de Cultura, Natividade González, que será a presentadora.
Venres, 13 de xaneiro de 2023
As bibliotecas municipais de Ames abren 2023 con dous encontros literarios. Nesta ocasión acollendo a Patricia de Lorenzo, e ao libro "Chévere: trinta e cinco anos de axitación cultural" e a Alfonso Pexegueiro, e ao seu libro “Mañana vino a verme la luna de los pájaros grandes”. Será o mércores 18 e o xoves 19, sempre ás 20:00 horas e no Pazo da Peregrina de Bertamiráns. Os dous actos estarán presentados pola concelleira de Cultura, Natividade González.
Luns, 09 de xaneiro de 2023
Dende este luns, 9 de xaneiro, está aberto o prazo para inscribirse nunha nova actividade de animación á lectura, desta volta na biblioteca de Bertamiráns, que organiza tres sesións de contacontos. Celebraranse os días 17, 18 e 19 de xaneiro ás 17:30 horas, e están dirixidos a cativos e cativas de entre 3 e 8 anos. Para anotarse é necesario enviar un correo electrónico ao enderezo biblioteca@concellodeames.gal, indicando nomes, apelidos, idades dos nenos/as e un teléfono de contacto ou chamar ao número 981 884 829.
Martes, 20 de decembro de 2022
As bibliotecas municipais de Ames pechan o ano cun novo encontro literario. Nesta ocasión acollendo ao doutor en Historia, Francisco Leira Castiñeira, e ao seu libro "Los Nadies de la Guerra de España". Será este mércores 21 de decembro, ás 20:00 horas, no Pazo da Peregrina de Bertamiráns. Acompañará ao autor o profesor e tradutor, Xabier Ron, nun acto presentado pola concelleira de Cultura, Natividade González.
Mércores, 14 de decembro de 2022
Este xoves, 15 de decembro, celebrarase unha nova edición dos encontros literarios das bibliotecas municipais de Ames. Desta volta, a escritora Elba Pedrosa presentará a obra “Agora que cala a noite”. Será ás 20:00 horas, no Pazo da Peregrina de Bertamiráns. A autora estará acompañada por Xosé Antonio López Silva, profesor e crítico, e por César Lorenzo, editor e xornalista. O evento será presentado pola concelleira de Cultura de Ames, Natividade González.
Martes, 29 de novembro de 2022
O Concello de Ames, a través da Concellería de Cultura, vén de realizar melloras nos equipamentos da biblioteca municipal de Bertamiráns. Nas últimas semanas renovouse o mobiliario e melloráronse os equipos tecnolóxicos e informáticos. Investíronse 12.693,02 euros, dos cales 4.793,09 euros foron concedidos a través da subvención a entidade locais de Galicia para o equipamento e mellora das instalacións e locais utilizados para a realización de actividades culturais, e o importe restante, 7.899,93 euros, foi asumido polo Concello de Ames.
Luns, 21 de novembro de 2022
Dende este martes, 21 de novembro, está aberto o prazo para inscribirse nunha nova actividade de animación á lectura que ofrecen as bibliotecas municipais de Ames para a cativada. Nesta ocasión, trátase dun contacontos pensado para nenos e nenas de entre 3 e 8 anos, que terá lugar tanto no Milladoiro como en Bertamiráns, realizándose tres quendas en cada lugar. Para participar é necesario anotarse enviando un correo electrónico ao enderezo biblioteca@concellodeames.gal ou chamando aos números 981 530 807 (para as sesións no Milladoiro) e 981 884 829 (para as quendas en Bertamiráns).
Mércores, 16 de novembro de 2022
As bibliotecas amesás celebran unha nova edición dos seus encontros literarios, nesta ocasión acollendo á xornalista e escritora Marga Tojo e ao seu libro "Arder: poética do que acontece na cidade". Será este xoves 17 de novembro, ás 20:00 horas, no Pazo da Peregrina de Bertamiráns. Acompañará á autora a xornalista Elena Martín, de Xarda Cooperativa Galega de Comunicación, nun acto presentado pola concelleira de Cultura, Natividade González.
Luns, 24 de outubro de 2022
O mes de outubro está cheo de actividades para conmemorar o Día nacional do Dano Cerebral, que se conmemora o 26 de outubro. Este ano, tamén para nenas e nenos, que poderán coñecer mellor o dano cerebral adquirido grazas a Os Bolechas. E é que a Federación Galega de Dano Cerebral (FEGADACE) editou, coa axuda destes coñecidos personaxes, a guía 'Mireia conta que é o dano cerebral adquirido'. Trátase dunha nova guía 'Os Bolechas' conta ás nenas e nenos como é a nosa discapacidade e cales son as súas causas.
- ‹ anterior
- 9 de 18
- seguinte ›