Esta mañá o alcalde de Ames, Blas García, xunto á concelleira de Benestar Social, Uxía García, visitou a poeta de Ames, Filomena Fraga, que cumpriu 100 anos hoxe martes 19 de maio. Filomena é veciña de Agrón e autora da obra A Cancela, publicada por primeira vez en 1995 e reeditada polo Concello de Ames en 2006. Filomena Fraga foi a primeira muller e a segunda persoa en recibir no ano 2019 a medalla do Concello de Ames. Ademais, en 2018 foi homenaxeada polo Concello de Ames no acto de conmemoración do Día Internacional das Mulleres, por ser exemplo vivo e un referente na loita pola igualdade.

O Concello de Ames, a través da Concellaría de Benestar Social, organiza para o venres 8 de maio, ás 12.00 horas, unha charla no auditorio da Casa da Cultura do Milladoiro sobre a regularización extraordinaria de inmigrantes 2026 en España. As solicitudes pódense presentar desde o 16 de abril ata o 30 de xuño de 2026, permitindo obter un permiso de residencia. Dita charla será impartida polas asesoras xurídicas do departamento de Benestar Social e polo técnico municipal de migración. A través deste proceso regularización pódese obter o permiso de residencia e traballo.

O Concello de Ames, a través da Concellaría de Benestar Social e Voluntariado, colabora con Cidalia no impulso do proxecto Museo Migrante Migrante en Movemento, unha iniciativa creada e dirixida pola artista visual Angélica Dass, que entende a migración coma unha condición inherente á experiencia humana. MMM recolle historias de movemento a través de obxectos, retratos e relatos. A migración enténdese como unha parte esencial da experiencia humana. Angélica Dass está en Ames ao longo desta semana impartindo obradoiros de memoria e fotografía nos IES de Ames, en Bertamiráns, e no IES do Milladoiro. O venres 17 de abril, ás 18.30 horas, impartirase na Casa da Cultura do Milladoiro a conferencia “A Historia Viva de Ames. Museo das inMigrantes”. Durante as actividades entregaranse exemplares do xornal A Historia Viva de Ames. Museo das inMigrantes, elaborado en 2020.

A Asociación Veciñal de Bugallido, en colaboración co Centro Cultural A Maía e a Asociación Agraria de Bugallido, Ortoño e Biduído, impulsa a terceira edición do Ciclo de xornadas sobre a saúde, baixo o lema “Abril, mes da saúde en Bugallido”, reafirmando así a continuidade e consolidación dunha iniciativa que ano tras ano medra en interese e participación.