[10-09-2018] Nadia Iglesias de Salvador disputou os días 2 e 3 de setembro o Campionato Europeo de Patinaxe Artístico nas illas Azores, no que conseguiu a medalla de prata na modalidade libre da categoría júnior. A amesá, que en xuño revalidou o título de campioa de España e o pasado ano conseguiu o primeiro campionato de Europa da historia do patinaxe artístico galego, participará no mundial júnior que se disputará en Francia do 4 ao 14 de outubro.

[10-09-2018] O alcalde de Ames, José Miñones, e maila subdelegada do Goberno na Coruña, Pilar López-Rioboo, mantiveron esta mañá unha xuntanza para analizar unha posible solución ao tráfico de vehículos pesados no núcleo urbano de Milladoiro. Neste encontro tamén participou o concelleiro de Urbanismo, Obras Públicas e Servizos Básicos, Blas García. Pilar López-Rioboo destaca a necesidade de desbloquear a situación e avanzar nun posible convenio entre Estradas, Xunta e DXT para buscar alternativas. A Subdelegación do Goberno convocará a unha reunión con Demarcación de Estradas de Galicia, Xunta, Dirección Xeral de Tráfico e os concellos de Ames e Teo para finais de mes. Polo núcleo urbano de Milladoiro, que conta con 12.000 residentes, circulan cada día uns 30.000 vehículos.

[08-09-2018] A próxima semana abre o segundo prazo de inscrición nas Escolas Culturais para o curso 2018/2019. A período de inscrición permanecerá aberta do 10 ao 14 de setembro, para apuntarse naquelas actividades e grupos nos que quedan prazas libres. O proceso de inscrición pódese realizar de xeito presencial na Casa da Cultura do Milladoiro e no Pazo da Peregrina de Bertamiráns, en horario de 9.00 a 14.00 horas. As clases comezarán a semana do luns 1 de outubro e rematarán o 31 de maio de 2019. As persoas interesadas poderán solicitar máis información chamando ao número de teléfono 981 535 940 ou enviando un correo ao enderezo de correo electrónico cultura@concellodeames.gal. A túa dereita, baixo o apartado de descargas, poderás obter un folleto informativo e consultar as prazas libres de cada unha das actividades ofertadas.

[07-09-2018] Este xoves, 6 de setembro, celebrouse o pleno ordinario correspondente ao mes de agosto no que a Corporación municipal aprobou por unanimidade a adhesión ao convenio de colaboración subscrito entre a Xunta de Galicia, a FEGAMP e o SEAGA, en materia de prevención e defensa contra os incendios forestais, para o establecemento dun sistema público de xestión da biomasa nas faixas secundarias. Outros dos temas que se aprobou por unanimidade foi a adhesión ao Protocolo Xeral de Actuación entre a Xunta de Galicia e a FEGAMP, para fomentar a implantación e fixación de empresas en Galicia, mediante a posta en marcha da iniciativa “Concellos Doing Business Galicia”. Tamén se aprobou por unanimidade a elección do xuíz de paz substituto do Concello de Ames e unha moción presentada por Ames Novo sobre os comedores escolares municipais.