O Concello de Ames, tras poñerse en contacto coa Conselleira de Turismo e coa Asociación de Hostaleiros da Provincia da Coruña, confirma que está permitido o servizo de entrega a domicilio por parte do sector hostaleiro durante o estado de alarma provocado polo COVID-19. O que non está permitido é que a clientela recolla o pedido nos establecementos hostaleiros.

O Concello de Ames decidiu o pasado 13 de marzo a suspensión de varios servizos municipais como consecuencia da pandemia do Coronavirus. Debido a que a execución destes servizos non é posible procedeuse a suspensión dos contratos, con efectos dende o día 14 de marzo de 2020 e mentres dure o estado de alarma, coas empresas e outras entidades que imparten os servizos de Escolas deportivas municipais, Escolas culturais e Servizos complementarios de educación e conciliación (Bos Días Cole, Tardes Divertidas, Comedores Escolares).

Este mércores, 18 de marzo, celebrouse unha xuntanza na Casa do Concello, en Bertamiráns, para abordar a situación actual no concello de Ames tras as medidas tomadas polo Goberno do Estado para atallar a crise sanitaria do COVID-19 e coordinar as actuacións á desenvolver que garantan o cumprimento das mesmas.

Dende o Concello de Ames lémbrase unha vez máis a importancia de cumprir as medidas postas en marcha polo Goberno do Estado para frear o avance do Coronovirus, a través da aprobación do Real Decreto 463/2020 que establece o estado de alarma. Deste xeito, incídese en que queda prohibido circular pola vía pública salvo nos casos recollidos no artigo 7 de dito Real Decreto. Tamén se recorda que as persoas que saían á vía pública deben de facelo soas (de xeito individual). O mesmo acontece para circular en vehículo, xa que só poderá ir unha persoa por vehículo, salvo casos excepcionais. O incumprimento destas medidas pode derivar en sancións económicas.