Ames vén de celebrar o primeiro Consello Sectorial da Xuventude con representación dos sectores mozos do concello. Esta xuntanza tivo lugar no salón de plenos da Casa do Concello de Ames, onde se expuxeron as principais demandas da mocidade amesá. Solicitáronse máis actividades e espazos: un local de reunión a cuberto durante as fins de semana en Bertamiráns, festas para menores de idade, obradoiros xuvenís, espazos para a mocidade con diversidade funcional e visitas culturais. Os mozos e mozas tamén reclamaron unha mellora das comunicacións entre O Milladoiro e Bertamiráns, así como unha maior frecuencia entre os dous núcleos e entre o rural durante as fins de semana. Propostas que foron tomadas en conta e serán estudadas.

O Concello de Ames, a través da Concellaría de Xuventude, vén de anunciar un novo curso de monitor/a de actividades de tempo libre. A formación, dunhas 350 horas de duración, comezará este mes de xaneiro ata o mes de abril no Pazo da Peregrina e terá un custo de 172€. Ao finalizar, os alumnos e alumnas recibirán un título homologado en todas as comunidades autónomas de España. O prazo de inscrición abrirase este venres 9 de xaneiro e rematará o 21 de xaneiro na Sede electrónica do Concello de Ames.

A Casa da Cultura de Bertamiráns acolle este sábado, 22 de novembro, ás 19:00 horas, a gala de entrega de premios do VI Certame Galetiktokers, unha iniciativa dos departamentos de Xuventude e de Normalización Lingüística do Concello de Ames, que se realiza por sexto ano consecutivo e que ten como obxectivo fomentar e impulsar a creatividade da rapazada e animar a creación de vídeos en galego a través das redes sociais e das novas canles de comunicación. Nesta edición presentáronse 56 vídeos, realizados por arredor de 100 mozos/as de Ames e doutras localidades de Galicia. O evento estará presentado pola actriz e presentadora Carlota Mosquera e amenizado musicalmente polo grupo Sacha na Horta. A gala é aberta ao público e para reservar praza cómpre confirmar asistencia enviando un correo electrónico ao enderezo: galetiktokers25@gmail.com. A gala será emitida en directo a través do Instagram de Xuventude Ames.

Desde as 11.00 horas de hoxe, 5 de novembro, e ata as 11:00 horas do venres, 7 de novembro, está aberto o prazo para votar a través de Instagram polos vídeos presentados ao concurso Galetiktokers, unha iniciativa dos departamentos de Xuventude e Normalización Lingüística do Concello de Ames, que pretende estimular a creatividade da rapazada animando á creación audiovisual en galego. Nesta sexta edición presentáronse preto de 60 vídeos, realizados por máis de 100 por mozos/as de Ames e doutras localidades de Galicia como Vilagarcía de Arousa, Ferrol, Ourense, etc. Premendo nesta ligazón pódense consultar as bases ao completo do VI Certame Galetiktokers.