Este pasado xoves, 28 de agosto, celebrouse a derradeira sesión dos Seráns de Ames 2025, que desta volta levou á praia fluvial de Tapia unha proposta lúdica de xogos para a rapazada e unha actuación musical da man de Mary Iglesias. Deste xeito, péchase o programa dos Seráns de Ames que se desenvolveu durante seis xoves dos meses de xullo e agosto en Tapia, Ortoño, Covas, Trasmonte e Bugallido.

Este xoves, a partir das 20.00 horas, retómanse as sesións do programa Encontros Literarios que se desenvolven no Pazo da Peregrina, en Bertamiráns. Desta volta, será a presentación do libro “A gran final. Contos e contas do fútbol galego”, unha obra coordinada por Xaquín Núñez Sabarís que conta coa colaboración de varios autores, xornalistas e personalidades do mundo do fútbol. Ademais da presenza de Núñez Sabarís, estarán presentes no encontro outros autores e colaboradores da obra: Lito Vila Baleato, Patricia Janeiro, Jesús Torres e Camilo Franco. 

Neste mes de maio, no que se conmemora o Día das Letras Galegas o vindeiro día 17, continúa a programación dos Encontros Literarios. Nesta ocasión, coa presentación do libro “A mirada de Flor”, da amesá Margarita Murillo. A sesión terá lugar este vindeiro mércores, día 7, ás 20.00 horas, no Pazo da Peregrina. Como vén sendo habitual, a entrada será libre ata completar aforo.

A Biblioteca municipal de Ames continúa coa súa programación de actividades dentro do programa “Abril, mes do libro en Ames”. Deste xeito, organizan un obradoiro de encadernación xaponesa, dirixido para a rapazada a partir de 3º de primaria. A actividade desenvolverase o venres 25 de abril no Milladoiro e o sábado 26 en Bertamiráns. O prazo de inscrición para participar está aberto desde o pasado venres, día 11, ata o vindeiro 21 de abril. Para participar, é preciso enviar un correo electrónico ao enderezo biblioteca@concellodeames.gal indicando nome, apelidos, curso e idade das crianzas participantes xunto cun número de teléfono de contacto.