Continúa a programación do “Ames en Festas 2025”, que reúne nunha mesma programación as festas da Madalena, no Milladoiro, e da Peregrina, en Bertamiráns. Nestes intres, está a ser a quenda de Bertamiráns, que continuará cos festexos ata este domingo, día 10. Como parte das festas da Peregrina, celebrarase a unha nova edición da Romaría Urbana, que terá lugar no parque do Ameneiral o sábado 9 de agosto. Comezará ás 13.30 horas cunha sesión vermú e, ao longo de toda a tarde haberá diversas actuacións musicais. Ademais, na xornada de mañá, venres 8, o artista teense Mondra estará a presentar o seu último traballo “De Ronda”. O concerto terá lugar no parque do Ameneiral a partir das 22.00 horas. 

Este xoves, 7 de agosto, chega ao parque do Ameneiral, en Bertamiráns, a primeira edición do Festival Emerxente, unha iniciativa enmarcada dentro da programación do “Ames en Festas 2025” e que nace co obxectivo de ofrecer aos artistas novos unha plataforma onde poder darse a coñecer e presentar os seus traballos. A cita, organizada polos departamentos de Cultura e Mocidade do Concello de Ames, terá lugar a partir das 20.00 horas e contará coas actuacións de Helena Pazos, MR. T, Lepayitss e Komojo. 

O ‘Ames en Festas 2025’ conta xa as horas para poñer comezo ás 10 xornadas de troula e música que se vivirán no Milladoiro, do venres 1 ao martes 5, coas súas festas da Madalena, e en Bertamiráns, do mércores 6 ao domingo 10 de agosto, coas da Peregrina. Este ano volverá a haber dous pregóns un inicial, no Milladoiro, que estará a cargo de catro mozos da asociación Arcea-Adames, e outro de peche en Bertamiráns, ofrecido por Ronald Rojas, migrante que reside en Bertamiráns dende hai varios anos. Coas escolla destes pregoeiros, desde as respectivas comisións de festas dos dous principais núcleos de Ames, buscouse representar e dar voz a dous colectivos que reflicten a diversidade e inclusión poboacional de Ames. 

O Concello de Ames acaba de aprobar, a través de decreto de Alcaldía e na Xunta de Goberno Local do pasado 3 de xullo, a concesión das axudas relativas á promoción das actividades culturais e á organización de festexos tradicionais. Despois de resolver as solicitudes presentadas, o Goberno municipal aprobou o reparto de 29.997,05 euros entre quince asociacións culturais e de 24.500 euros entre sete asociacións e comisións de festas. A estas subvencións puideron optar todas as asociacións do concello que realizan actividades de índole cultural e festas tradicionais. As entidades beneficiarias destas axudas recibirán o 50% da axuda concedida de xeito anticipado.