Este domingo, día 10 de agosto, o “Ames en Festas 2025” viviu o seu peche coa derradeira xornada das festas da Peregrina de Bertamiráns. Por cuarto ano consecutivo, Milladoiro e Bertamiráns celebraron de xeito conxunto as súas respectivas festividades, cunha programación que encadeou 10 xornadas festivas con actividades e propostas musicais para todos os públicos e gustos, buscando así que toda a veciñanza poida gozar das festas.

O alcalde de Ames e concelleiro de Cultura, Blas García, subliñou que “Ames ten unhas festas para todas e todos, sen ideoloxía, que buscan dinamizar as nosas rúas e activar a economía da vila. A proposta que fixemos en canto a cartel este ano é difícil de igualar e máis difícil aínda de superar”. 

Festas da Madalena  
Un ano máis, o Millarock foi o encargado de dar inicio ás festas da Madalena no Milladoiro o pasado venres 1 de agosto. A XIV edición do festival contou este ano actuacións de Ruxe Ruxe, Battosai e Ulex. 

Ao longo das cinco xornadas dos festexos da Madalena, arredor de 7.000 persoas se deron cita no Milladoiro para gozar das diferentes actividades e música que houbo na localidade, como a festa infantil para os máis pequenos da casa ou as noites de verbena con algunhas das mellores orquestras de Galicia, coma París de Noia, Os Satélites ou América de Vigo. 

Nova data para a actuación da Olympus 
A actuación da orquestra Olympus que estaba prevista para o peche das festas da Madalena, o pasado martes día 5, e que foi cancelada por motivos meteorolóxicos ao non garantir a seguridade dos asistentes e do equipo, celebrarase noutra data que se anunciará proximamente.

Festas da Peregrina
Por outra banda, Bertamiráns comezou as súas festas da Peregrina o mércores 6, uns festexos que se prolongaron ata este domingo, día 10. Ao longo destas xornadas, Bertamiráns tamén gozou dunha ampla programación cultural para todos os públicos. Algunhas das citas máis destacadas foron o concerto de Mondra no parque do Ameneiral o venres 8, que reuniu a máis de 3.000 asistentes, ou a verbena coa orquestra Panorama, o xoves 7, á que asistiron unhas 6.500 persoas. 

Por outra banda, a localidade contou tamén cunha festa infantil para a rapazada e as actuacións doutras recoñecidas orquestras galegas, coma a Cinema, Charleston Big Band, Metrópolis ou Compostela. 

Ademais, o parque do Ameneiral foi o lugar escollido para levar a cabo algunhas das iniciativas máis destacadas do programa. Por un lado, a primeira edición do Festival Emerxente, na que se deron citas novos artistas musicais de Ames e da súa contorna, ou a celebración dunha nova edición da Romaría Urbana, que contou con diversas actuacións musicais, postos para xantar ou obradoiros ao longo de toda a tarde do sábado. 

O Ames en Festas máis inclusivo  
Na edición deste 2025 do programa de festexos, a inclusión e a diversidade foron os piares fundamentais destas festas. Isto reflectiuse na escolla dos pregoeiros de ámbalas dúas localidades. 

Por un lado, o pregón inicial no Milladoiro correu a cargo de catro mozos da asociación Arcea-Adames: Martín Barreiro, Moncho Corral, José Manuel Fernández e Carlos Pais. A institución leva desenvolvendo o seu labor máis de 20 anos no Milladoiro, traballando e apostando pola inclusión das persoas con diversidade funcional de Ames e doutros concellos veciños. En canto ás festas da Peregrina, en Bertamiráns, o pregoeiro de peche foi Ronald Rojas, inmigrante venezolano que leva xa varios anos vivindo na localidade amesá. 

Tanto o pregón de inicio en Milladoiro, en representación das persoas con diversidade funcional, como o de clausura en Bertamiráns, no que a inmigración foi o foco principal, apostaron por dar voz a colectivos relevantes da poboación amesá.

Por outra banda, neste Ames en Festas tamén se contou cun horario de atraccións sen ruído, unha iniciativa para que as persoas con sensibilidade auditiva poidan gozar tamén das atraccións durante as xornadas festivas. Ademais de dita iniciativa, no Millarock, contouse con mochilas vibratorias, para as persoas con discapacidade auditiva, e cunha plataforma elevada con rampla, para as persoas con mobilidade reducida. Deste xeito, buscouse crear espazos adaptados para garantir que estas persoas puideran gozar dos concertos e das festas en condicións de igualdade. 

Novas relacionadas: 

La Voz de Galicia: "Los diez días de fiestas de Ames, en O Milladoiro y Bertamiráns, superaron los 20.000 asistentes"

El Correo Gallego: "Éxito do Ames en Festas 2025: reúne máis de 20.000 persoas"

Diario de Santiago: "O “Ames en Festas 2025” congregou a máis de 20.000 persoas na súa cuarta edición"

AMSGO!: "O “Ames en Festas 2025” congregou a máis de 20.000 persoas"