Pestanas principais

Departamento de Turismo

    • Enderezo: Casa do Concello. Praza do Concello, número 2, Bertamiráns.
    • Teléfono: 981 88 30 02, extensión 9966.
    • Horario de atención ao público: 09:00 a 14:00 horas
    • Responsable municipal:
    • Responsable técnico:
      • Sonia Moure Oliveira, técnica de turismo.
Outros Datos: 

Novas do departamento

Ames, Brión, Dodro e Padrón programan unha saída da ruta “As Pegadas de Rosalía” para o sábado 29 de abril

Os concellos de Ames, Brión, Dodro e Padrón programan para o vindeiro sábado, 29 de abril, unha saída pola ruta rosaliana que transcorre polos lugares máis emblemáticos da vida de Rosalía de Castro e o seu legado literario. Trátase dun itinerario que segue o trazado orixinal proposto por Avelino Abuín de Tembra na década dos noventa, actualizado polo presidente da Fundación Rosalía de Castro, Anxo Angueira, no ano 2017, e presentado na feira de turismo Fitur en colaboración con esta entidade, convertido nun proxecto turístico intermunicipal denominado “As Pegadas de Rosalía”, en xaneiro do ano 2018. As inscricións son gratuítas e deberán realizarse a través desta ligazón dende hoxe ata o día 25 de abril. As prazas serán adxudicadas por orde de rexistro e deberase seleccionar o punto de saída e regreso do autocar.

Arredor de 150 autocaravanas participarán nunha concentración coincidindo co acto de inauguración da nova área de Bertamiráns

A Asociación Galega de Autocaravanas, en colaboración co Concello de Ames, organiza para os días 13, 14 e 15 de marzo unha concentración de caravanas coincidindo co acto de inauguración da nova área de Bertamiráns. Debido a isto a avenida Jose Luis Azcárraga será de sentido único (dirección Covas-Bertamiráns), dende as 15.00 horas do venres 13 ata as 20.00 horas do domingo 15 de marzo, xa que as caravanas estacionarán en batería ao longo de dita rúa. A nova área está situada no lugar das Pateiras e dispón de espazo para 15 aparcamentos de autocaravanas, unha delas está adaptada para persoas con mobilidade reducida.

Blas García presenta en Fitur a campaña “Fíos... até a fin, dende Santiago até Fisterra”

Este pasado mércores, 24 de xaneiro, o alcalde de Ames e responsable da área municipal de Turismo, Blas García, presentou na Feira Internacional de Turismo, que se celebra en Madrid do 24 ao 28 de xaneiro, a campaña “Fíos... até a fin, dende Santiago até Fisterra”. Trátase dunha campaña posta en marcha pola Asociación de Concellos do Camiño Fisterra-Muxía, da que forma parte o Concello de Ames, para promocionar dito Camiño de Santiago. Premendo nesta ligazón podes ver o vídeo promocional desta campaña.

Catro empresas de Ames reciben a certificación Sicted de calidade turística

O establecemento de turismo rural “As Bentinas” de Ventín, o Albergue de Peregrinos de Milladoiro, a empresa de turismo de aventuras “Amextreme” e a axencia de viaxes “Alma Gaia”, dedicada ao turismo de sensacións, recibiron este ano o selo do Sistema Integral de Calidad Turística en Destino (Sicted) que outorga a Secretaría de Estado de Turismo co apoio da Federación Española de Municipios y Provincias (FEMP). A distinción recoñece a calidade dos servizos turísticos ofrecidos por estas empresas.

Celebrada a primeira etapa da peregrinación da parroquia de Ortoño pola ruta “Ría de Muros-Noia”

O pasado sábado 22 de xaneiro arredor de 120 veciños e veciñas de Ortoño, Covas, Trasmonte e do concello de Brión participaron na primeira etapa da ruta “Ría de Muros-Noia”. A andaina de peregrinación foi organizada pola parroquia de Ortoño, coa colaboración da Concellaría de Turismo. As persoas participantes percorreron uns once quilómetros dende a igrexa da Virxe do Camiño, en Muros, ata Santiago de Tal.

Chega a Ames a exposición sobre os 50 anos da Casa de Rosalía

O alcalde de Ames, Blas García Piñeiro, inaugurou onte na Praza da Maía a exposición ‘A Casa de Galicia. 50 anos da Casa de Rosalía’, na que se repasa a historia deste museo e se lembra o fito que supuxo en pleno franquismo conseguir mercar, restaurar e musealizar esta casa grazas á colaboración de milleiros de persoas. O acto, ao que tamén acudiu o presidente da Fundación Rosalía de Castro, Anxo Angueira, estivo amenizado coa actuación musical de María e Dora Iglesias.

Comezan as obras para dotar a Bertamiráns cunha nova área de autocaravanas

A localidade de Bertamiráns pronto contará cunha nova área de autocaravanas. Esta semana comezaron as obras por parte da empresa CONSCYC 2020 SL para crear esta nova área dedicada aos/ás autocaravanistas. O contrato foi adxudicado por un importe de 68.437 euros (IVE incluído). Para executar este proxecto asinouse previamente un convenio coa Deputación da Coruña, a través do cal a entidade provincial sufragará o 80% das obras, mentres que o Concello de Ames achegará o 20% restante. Dita área que estará situada no lugar das Pateiras e disporá de espazo para 15 aparcamentos de autocaravanas, unha delas será adaptada para persoas con mobilidade reducida.

Concello, Deputación e AGA inauguran a nova área de autocaravanas de Ames situada en Bertamiráns

O Concello de Ames, a Deputación da Coruña e a Asociación Galega de Autocaravanas inauguraron a nova área de autocaravanas de Bertamiráns. Ao acto sumáronse arredor de 100 autocaravanas e máis de 200 autocaravanistas, que participaron nunha concentración de tres días coincidindo coa estrea desta nova infraestrutura.

Curso sobre as novas medidas hixiénico sanitarias no sector da hostalería

O GDR “Terras de Compostela”, en colaboración co concello de Ames, organiza un curso para dar a coñecer aos profesionais da hostalería as novas medidas hixiénico sanitarias que veñen de poñerse en marcha no sector. O curso desenvolverase o martes, 28 de setembro, entre ás 17:00 e as 21:00 horas, na Casa da Cultura do Milladoiro.  Os/as profesionais interesados/as en asistir deberán enviar un correo ao departamento de turismo sonia.moure@concellodeames.gal, ou chamar ao teléfono 981883002, ext 9966. Os/as asistentes recibirán un diploma que acredite a súa asistencia ao curso. 

Danse a coñecer as persoas gañadoras da terceira edición do concurso de fotografía Enfoca Ames

A Xuntanza de Empresarios de Ames, en colaboración co Concello de Ames, organizou a terceira edición do concurso de fotografía Enfoca Ames. O obxectivo deste certame é fomentar o achegamento da cidadanía aos lugares máis emblemáticos do concello de Ames. A esta edición presentáronse un total de 52 fotografías, repartidas entre as tres categorías existentes (paisaxe, macro e artística). O xurado, que estivo composto por catro persoas (dúas achegadas polo Concello e outras dúas por XEA), encargouse de elixir as nove mellores fotografías. Ademais, en cada categoría outorgáronse tres accésits. Os/as premiados/as serán notificados/as mediante chamada telefónica.

Eventos del departamento

>"Altamira Brilla": presentación do proxecto

A conmemoración da histórica Baralla de Altamira dará comezo o venres 10 de xuño coa presentación do proxecto e posta en valor das Torres de Altamira e as investigacións e os avances nos traballos para a elaboración do plan director das Torres de Altamira nunha sesión na que intervirá o arquitecto Mario Crecente. Será no Pazo da Peregrina, en Bertamiráns ás 20:00 horas.

>"Altamira Brilla": ruta histórica, representación e concertos

A festa histórica do val da Maía, que organizan os Concellos de Ames e Brión, xunto coa Deputación da Coruña, para conmemorar a histórica Batalla de Altamira, chega esta semana á súa segunda edición. Na xornada do sábado os participantes poderán gozar dunha ruta histórica, da representación teatral a cargo do grupo Os Quinquilláns e dos concertos de Caldo e de Grande Amore. Para participar nestas actividades é necesaria inscrición previa.

>Andaina polo Mar de Ovellas

O Concello de Ames, a través dos departamentos de Normalización Lingüística e Turismo, organizou para o domingo 7 de xuño unha andaina polo Mar de Ovellas. Esta actividade, incluída na programación de Rosalía 2026, estará teatralizada polos Quinquilláns e Lupe Blanco. A andaina rematará no local social de Trasmonte cunha pequena festa con música e degustación de petiscos. As persoas que queiran participar teñen que escribir un correo electrónico ao enderezo normalizacion@concellodeames.gal.

>Andaina “Rosalías da Vida” en conmemoración do 8M

Os concellos da Ruta Rosaliana (Ames, Brión, Dodro, Padrón e Santiago de Compostela) organizan para o Día Internacional da Muller a andaina “Rosalías da Vida” que terá unha distancia de 20 quilómetros. A saída será dende Lestrobe, en Dodro, ás 9.00 horas, e rematará as 18.00 horas coa chegada ao acto institucional que se realizará na praza do Obradoiro, en Santiago de Compostela. Os/as participantes de Ames uniranse á andaina en Padrón, na praza de Rodríguez Cobián, ás 9.30 horas. Haberá dous puntos de avituallamento, en Padrón e no Milladoiro. O obxectivo é conmemorar o 8M tendo presente a Rosalía de Castro, unha muller que marcou un antes e un despois na nosa historia.

>Batalla de Altamira

Despois de adiar varias actividades no mes de xuño debido á meteoroloxía adversa por choiva, volve “Altamira Brilla”, a festa histórica do Val da Maía, organizada polos Concellos de Ames e Brión, xunto coa Deputación da Coruña, para conmemorar a histórica Batalla de Altamira. O programa inclúe a representación teatral “A Batalla de Altamira”, a cargo do grupo Os Quinquilláns; a actuación dos grupos de pandeireteiras de Ames e Brión; e o concerto do grupo Carmela, que se van celebrar o domingo 21 de setembro en horario de mañá e tarde. Todas as actividades son de acceso libre ata completar aforo.

>Café con Verso e Caldo de Gloria

 O xoves 22 de febreiro desenvolverase unha nova edición das iniciativas “Caldo de Gloria” e “Café con verso” nos locais de hostalaría de Ames. Deste xeito, repartiranse nos locais de hostalaría unhas tarxetas con versos rosalianos para difundir a súa obra, pensamento e figura. A iniciativa Café con verso xurdiu no ano 2017 froito da colaboración entre o Concello de Ames e mailo poeta amesán Carlos Negro. Así mesmo, a hostalaría tamén servirá o caldo que a escritora describe no seu poema “Miña casiña, meu lar” de Follas Novas.

>Exposición: "A Casa de Galicia. 50 anos da Casa de Rosalía"

Ata o 2 de xuño, a Praza da Maía, en Bertamiráns, acolle a exposición "A Casa de Galicia. 50 anos da Casa de Rosalía", na que se repasa a historia deste museo e se lembra o fito que supuxo en pleno franquismo conseguir mercar, restaurar e musealizar esta casa grazas á colaboración de milleiros de persoas. A mostra está comisariada por Pepe Barro, tamén autor da museoloxía da Casa-Museo.

Esta exposición fai un repaso pola historia da Casa-Museo, que se abriu ao público o 15 de xullo de 1971, en pleno franquismo grazas, á implicación de milleiros de persoas e entidades de todo o país e da emigración. O Patronato Rosalía, creado en 1947, converteuse en refuxio do galeguismo, con actos como a Misa de Rosalía en Bonaval, que se constituíron como auténticos encontros de afirmación galeguista.

>Lugares Rosalianos: Pazo da Peregrina

O Concello de Ames, a través do departamento de Turismo, organizou para o sábado 20 de maio, ás 12.00 horas, unha visita ao Pazo da Peregrina de Bertamiráns, que se enmarca dentro do programa de visita aos Lugares Rosalianos que marcaron a vida e obra de Rosalía. Ditas visitas están teatralizadas polos Quinquilláns. Esta actividade enmárcase dentro do convenio asinado polos Concellos de Ames, Brión, Dodro e Padrón para promover a ruta As pegadas de Rosalía. Para participar hai que enviar un correo electrónico ao enderezo turismo@concellodeames.gal.

>Ruta "Pegadas de Rosalía"

O Concello de Ames programa para o sábado 14 de setembro unha saída pola ruta rosaliana que transcorre polos lugares máis emblemáticos da vida de Rosalía de Castro e o seu legado literario. Trátase dun itinerario que segue o trazado orixinal proposto por Avelino Abuín de Tembra na década dos noventa, actualizado polo presidente da Fundación Rosalía de Castro, Anxo Angueira, no ano 2017, e presentado na feira de turismo Fitur en colaboración con esta entidade, convertido nun proxecto turístico intermunicipal denominado “As Pegadas de Rosalía”, en xaneiro do ano 2018