O Concello de Ames, a través dos departamentos de Normalización Lingüística e Turismo, organizou para o domingo 10 de maio unha andaina polo Mar de Ovellas. Esta actividade, incluída na programación de Rosalía 2026, estará teatralizada polos Quinquilláns e Lupe Blanco. A andaina rematará no local social de Trasmonte cunha pequena festa con música e degustación de petiscos. As persoas que queiran participar teñen que escribir un correo electrónico ao enderezo normalizacion@concellodeames.gal. Ademais, para o sábado 9 de maio está aberto o prazo para inscribirse na visita aos lugares Rosalianos que marcaron a vida e obra de Rosalía. Neste caso visitarase o Pazo da Peregrina de Bertamiráns. Para participar hai que enviar un correo electrónico ao enderezo turismo@concellodeames.gal.

A Asociación Galega de Autocaravanas, en colaboración co Concello de Ames, organiza para os días 13, 14 e 15 de marzo unha concentración de caravanas coincidindo co acto de inauguración da nova área de Bertamiráns. Debido a isto a avenida Jose Luis Azcárraga será de sentido único (dirección Covas-Bertamiráns), dende as 15.00 horas do venres 13 ata as 20.00 horas do domingo 15 de marzo, xa que as caravanas estacionarán en batería ao longo de dita rúa. A nova área está situada no lugar das Pateiras e dispón de espazo para 15 aparcamentos de autocaravanas, unha delas está adaptada para persoas con mobilidade reducida.

A Xuntanza de Empresarios de Ames e o Concello de Ames organizaron a quinta edición do concurso de fotografía Enfoca Ames. O obxectivo deste certame é fomentar o achegamento da cidadanía aos lugares máis emblemáticos do concello de Ames. A esta edición presentáronse un total de 51 fotografías, repartidas entre as tres categorías existentes (artística, paisaxe e patrimonio). Este ano incrementouse o importe dos premios e repartiranse 1.125 euros para gastar nos comercios asociados á XEA. O xurado, que estivo composto por catro persoas (dúas achegadas polo Concello e outras dúas por XEA), encargouse de elixir as nove mellores fotografías. Os/as premiados/as foron notificados/as mediante chamada telefónica.

Este pasado martes, 30 de setembro, o Hotel Congreso, localizado no concello de Teo, acolleu a entrega de diplomas ás empresas formadas no Sistema Integral de Calidade Turística Española en Destino, SICTED. En total, recibiron esta distinción 34 profesionais de establecementos e servizos vencellados ao turismo na contorna compostelá, dos cales 6 pertencen a Ames. Amextreme Kayak, Casa Abelleira, Casa do Boi, Hotel Payro e Onde Keiras, renovaron o seu compromiso, mentres que o guía turístico Guía da Maía recibiu por primeira vez esta distinción.