Axenda

Ex., 13-04-2024
Sábado, 13 de abril de 2024

O club de Taekwondo TKDenodo organiza, coa colaboración do Concello de Ames e por delegación da Federación Galega de Taekwondo e a Secretaría Xeral para o Deporte da Xunta de Galicia, o campionato provincial en idade escolar das modalidades técnica e freestyle de Taekwondo. O torneo terá lugar o sábado, 13 de abril, no polideportivo do Milladoiro a partir das 9.00 horas. Participan rapaces e rapazas de 6 a 16 anos do programa Xogade. Esta proba clasificará para o campionato galego, que terá lugar o vindeiro sábado, 27 de abril, en Vigo.

Sábado, 13 de abril de 2024

Este sábado, 13 de abril, a Praza da Maía de Bertamiráns acollerá a terceira edición da Feira de Saúde e Ben-Estar, organizada polo Concello de Ames a través da concellería de Promoción da Saúde. A partir das 11:00 horas e ata as 19:00 horas, un total de 9 asociacións (ALCER, ANEDIA, ACEM, Fonte da Virxe, Alcohólicos Anónimos, AL-ANON, CONARTRITES, ASANOG e AEPPNA) participarán neste evento cos seus stands para proporcionar información sobre a súa labor a todas aquelas persoas que se acheguen ata a feira. A temática central desta edición será a menopausia e os seus efectos na vida das mulleres.

Sábado, 13 de abril de 2024

Durante o mes de abril, a Escola Municipal de Música organiza unha serie de obradoiros musicais dirixidos á veciñanza amesá. Así,  o segundo dos cursos celebrarase o 13 de abril, e estará dirixido por Juanjo Abella López, profesor de música electrónica e tecnoloxía musical. Neste taller, a veciñanza aprenderá que é e como funciona un home studio, e descubrirá as amplas posibilidades que ofrece, desde a edición de son ata a produción de cancións propias.

Martes, 16 de abril de 2024

Dentro do ciclo Abril de Cine, o martes 16 de abril proxéctase a película The Straigth Story (Unha historia verdadeira), de David Lynch. Baseada nunha historia real, narra a viaxe de Alvin Straight, un ancián que vive coa súa filla con discapacidade, para ver ao seu irmán enfermo no único medio de transporte do que dispón: unha máquina cortacéspede. Nesta ocasión, o coloquio posterior contará coa participación do realizador, guionista e produtor galego Alfonso Zarauza. A proxección será na Casa da Cultura do Milladoiro, ás 20:00 horas

martes, 16 de Abril de 2024 a xoves, 18 de Abril de 2024

Os días 16, 27 e 18 de abril a biblioteca de Bertamiráns acolle unha sesión de contacontos para nenos e nenas de 3 a 8 anos. As familias interesadas poderán inscribirse entre o 8 e o 13 de abril chamando ao teléfono 981 884 829, ou enviando un correo a biblioteca@concellodeames.gal. Deben indicar nome, apelidos, idade e un teléfono de contacto.

Xoves, 18 de abril de 2024

O xoves 18 de abril, Margareita Murillo presenta no Pazo da Peregrina de Bertamiráns "Protocolo e Imagen: Relevancia protocolaria de la imagen". O acto estará presentado polo alcalde de Ames, Blas García. Tamén asistirá a concelleira e deputada provincial Natividade González.

Segundo a súa autora, o propósito deste ibro é convidar aos lectores a explorar a súa propia relación coa vestimenta, e comprender e descubrir a importancia e o potencial da imaxe persoal para crear unha representación propia positiva e auténtica.

O libro está dividido en dez bloques temáticos, nos que se exploran os códigos de vestimenta en diversos contextos específicos.

Xoves, 18 de abril de 2024

Co obxectivo de que a Axenda 2030 sexa un proxecto participativo, o Concello de Ames organiza un encontro do Foro Municipal da Axenda Urbana cos axentes clave do municipio o 18 de abril, ás 20:00 horas, na Casa da Cultura de Bertamiráns. Para participar é necesario cubrir un formulario específico, dispoñible nesta ligazón, antes do 9 de abril.

Xoves, 18 de abril de 2024

O xoves 18 de abril estará en Bugallido Olaya Fernández Seijas, nutricionista do Servizo de Atención Primaria de Bertamiráns e Brión, para dirixir o relatorio “Hábitos de alimentación saudable".

Xoves, 18 de abril de 2024

Hoxe, ás 17:30 horas, partirá do centro de saúde do Milladoiro a andaina saudable de SaúdeAndo . As sesións, para as non é precisa inscrición previa, duran entre unha hora e hora e media, e teñen unha dificultade media-baixa. Estas saídas contan sempre coa presenza dun monitor de marcha nórdica, pensando nas persoas que desexen practicar esta modalidade (sempre de maneira voluntaria).

Venres, 19 de abril de 2024

O venres 19 de abril, ás 18:00 horas,  Cris de Caldas e Xabi do Miño levarán á Casa da Cultura do Milladoiro o espectáculo "Contos en familia". Dirixido a público familiar, trátase dun espectáculo de contos, música e presentación dunha ampla escolma de libros esenciais para tratar temas clave na crianza. Un menú de conto pensado para introducírmonos no mundo da literatura infantil e para compartir experiencias e inquedanzas.