Axenda
Venres, 09 de xuño de 2023
O venres 9 de xuño terá lugar na Casa da Cultura do Milladoiro un obradoiro de electrónica e programación de robots, organizado pola aula AMTIC. O taller estará composto por dúas prácticas de programación electrónica dunha hora e media de duración cada unha, para dous grupos de idade (de 8 a 10 e de 11 a 14 anos). Ademais, ofrecerase unha charla sobre a materia, e habilitarase un espazo de exposición de robots autónomos e unha impresora 3D. A inscrición pode facerse de maneira presencial nas instalacións da aula AMTIC ou a través do enderezo electrónico informatica.milladoiro@concellodeames.gal, enviando esta ficha ou de xeito presencial, acudindo ás instalacións da Aula Municipal Tecnolóxica da Información e da Comunicación (AMTIC)
Venres, 09 de xuño de 2023
A Casa da Cultura do Milladoiro acollerá o venres, 9 de xuño, a gala de entrega de premios do XX Certame Literario do Concello de Ames, a partir das 20:00 horas. O evento será conducido por Josito Porto, que tamén protagonizará un número musical con Sabela Dacal e Rafa Otero. Por outra banda, o grupo de Linguaxe Musical eo Combo Folk da Escola Municipal de Música de Ames (EMMA) tamén ofrecerán unha actuación. Ao acto acudirán os encargados de xulgar os textos presentados ao concurso, Ismael Ramos Castelo, Anna R. Figueiredo e Andrea Porto Mato; así como as persoas premiadas tanto na modalidade de poesía como na de narrativa.
Sábado, 10 de xuño de 2023
“Altamira Brilla”, a festa histórica do val da Maía, organizada polos Concellos de Ames e Brión, xunto coa Deputación da Coruña, para conmemorar a histórica Batalla de Altamira, chega o sábado 10 de xuño á súa terceira edición.O programa está conformado por unha ruta teatralizada polos escenarios da batalla, polos espectáculos de Títeres Alacrán e do grupo teatral Os Quinquilláns; e pola actuación musical de Fillas de Cassandra. Preme nesta ligazón para reservar as entradas, que son de balde.
Domingo, 11 de xuño de 2023
O vindeiro domingo, 11 de xuño, celebrarase na praia fluvial de Tapia a clausura do programa Amessan 2022-2023, a partir das 12:00 horas. Os participantes desta iniciativa de ocio saudable, xente maior de 60 anos de Ames, gozarán dun xantar popular, dunha foliada, de obradoiros, un bingo e máis actividades. A xornada contará coa actuación de Luis Rey, e os participantes poderán mostrar o aprendido ao longo de todo o ano. En caso de choiva, as actividades trasladaranse ao CEIP Agro do Muíño.
Venres, 16 de xuño de 2023
O día 16 de xuño celebrarase o festival de fin de curso do alumnado da Escola Municipal de Música de Ames (EMMA). Será ás 19:00 horas na Casa da Cultura de Bertamiráns. A entrada é de balde e aberta ao público, polo que poderán asistir as familias e toda a cidadanía que o desexe.
Sábado, 17 de xuño de 2023
O programa Apego pecha a programación do primeiro semestre de 2023 cun concerto, que estará protagonizado por Uxía Lambona e a Banda Molona. A actividade, dirixida a un público familiar, terá lugar o sábado, 17 de xuño, ás 19:00 horas, na Casa da Cultura de Bertamiráns. Se o tempo nolo permite, o concerto trasladarase para exterior, e será na propia Praza de Chavián para poder acoller a todas as familias que queiran vir gozar do concerto. O prazo para anotarse está aberto dende hoxe, día 8, ata o 15 de xuño. As persoas interesadas en participar deben enviar un correo electrónico ao enderezo normalizacion@concellodeames.gal no que se indique nome, apelidos, idades dos rapaces/as e un número de teléfono de contacto.
Sábado, 17 de xuño de 2023
O sábado, 17 de xuño, a partir das 12.00 horas, celebrase en Ames un novo Encontro Intercultural no Pazo da Peregrina, en Bertamiráns. Ademais da degustación de pratos típicos de diferentes nacionalidades, os asistentes poderán desfrutar dun obradoiro de cociña denominado “Cambio climático no prato”, da peza teatral “Vaia Tea!” de Xucrut Teatre, dunha actuación musical a cargo do músico venezolano Misael Sánchez e dun posto informativo e de venda de comercio xusto. Para participar no obradoiro de cociña hai que inscribirse previamente a través deste formulario web. Trátase dun obradoiro de cociña sostible para concienciar á poboación sobre a cociña de aproveitamento.
Domingo, 18 de xuño de 2023
A Escola Municipal de Teatro de Ames representa o 18 de xuño a obra “Non podo máis!”, na Casa da Cultura de Bertamiráns, ás 18:30 horas. Trátase dunha comedia irreverente sobre os aspectos da vida que conseguen descolocarnos e sacarnos dos nosos cabais. Será a partir das 20:30 horas. O día 8 de xuño, ás 20:30 horas, haberá un novo pase na Casa da Cultura de Bertamiráns. Os convites, que son de balde, pódense retirar xa na Billeteira electrónica do Concello de Ames.
Xoves, 22 de xuño de 2023
A Concellaría de Xuventude de Ames organiza para o 22 de xuño, a través do programa Trouleando, unha xornada no Aquapark de Cerceda, un parque acuático cunha ampla e variada gama de atraccións nas que pasar unha xornada de ocio con aquatubos, piscina de ondas, roaller coaster, tobogán de donuts, kamikaze, etc. As persoas interesadas poden anotarse entre os días 8 e 14 de xuño (ambos incluídos). As prazas para participar son limitadas e asignaranse por orde de chegada.
Venres, 23 de xuño de 2023
O venres 23 de xuño comeza o programa do AmesOn coa actuación do grupo A Banda da Balbina, que terá lugar no parque do Ameneiral de Bertamiráns ás 21:00 horas. Trátase dunha agrupación nacida no concello de Brión no ano 2007, e conformada por Silvia Carreira (voz), Juan Fuentes (guitarra), Dani Fuentes (baixo e coros), Carlos Gómez (batería) e Gabriel Riveiro (acordeón). As súas creacións manteñen uns ritmos festeiros e unha retranca propia do país. Dende os seus inicios mesturan o ritmo e a música coa musicalidade do galego.
- 1 de 3
- seguinte ›