[25-06-2018] Este pasado venres, 22 de xuño, celebráronse as comisións informativas previas ao pleno ordinario deste xoves 28 de xuño. En primeiro lugar, tratouse a aprobación dunha ordenanza para a protección e conservación dos camiños e vías públicas municipais, a sexta modificación da Relación de Postos de Traballo, a aprobación das bases para a elección de xuíz/a de paz substituto do Concello de Ames, e a solicitude dunha traballadora municipal da correspondente autorización de compatibilidade para o exercicio de actividade privada como arquitecta en horario de tarde. Ademais, abordáronse sete propostas presentadas por parte dos grupos municipais de Pacto por Ames, Ames Novo, PSdeG-PSOE e polo goberno municipal.

[25-06-2018] O Concello de Ames conmemora o Día Mundial do Refuxiado, que se celebra cada 20 de xuño, coa exposición da mostra "No colo da esperanza", que pode visitarse no Pazo da Peregrina, situado en Bertamiráns, ata o venres 29 de xuño. Dita mostra foi inaugurada o sábado, 16 de xuño, durante a celebración do Encontro Intercultural cunha visita guiada da man do propio autor, Felipe Carnotto.

[23-06-2018] Estas dúas últimas semanas realizáronse novas xuntanzas das comisións de Orzamentos Participativos 2018 para a mocidade e para o rural, onde se informou e se analizaron as preto de 500 propostas presentadas. En ditas xuntanzas elaboráronse as listaxes de propostas que terá que votar a veciñanza de Ames para incluír nos Orzamentos Participativos 2018. Para o rural haberá que elixir entre 112 propostas, mentres que a mocidade terá que votar entre 46 propostas. As asembleas de votación serán do 25 de xuño ao 5 de xullo nas Casas da Cultura de Bertamiráns e do Milladoiro, así como nos locais sociais das parroquias do rural. Todas as parroquias presentaron propostas e todas as parroquias están representadas na comisións do rural e participan deste proceso.

[22-06-2018] O Concello de Ames, a través do departamento de Persoal, fai público o anuncio co resultado da proba de lingua galega do proceso selectivo para a creación dunha bolsa de traballo de persoal de cociña do Concello de Ames. Premendo no enlace que está a túa dereita, baixo o apartado de descargas, poderás obter o devandito anuncio.