Actualidade

Ex., 28-06-2025
Ex., 28-06-2025
Venres, 21 de decembro de 2018
O Concello de Ames organiza o II Torneo de Nadal de fútbol sala 3x3

[21-12-2018] O Concello de Ames, a través da Concellaría de Deportes, organiza durante o sábado 29 de decembro, a partir das 10.00 horas, o segundo Torneo de Nadal de fútbol sala 3x3 Concello de Ames. Este torneo desenvolverase no pavillón municipal do Milladoiro. Ademais, vanse organizar outras actividades deportivas durante decembro e xaneiro como son o II Torneo de Nadal de baloncesto, a XII Carreira Ciclista do Pavo e mailo II Torneo de Nadal de fútbol. Estas actividades enmárcase dentro da programación municipal de Nadal. Premendo na ligazón que está a túa dereita, baixo o apartado de descargas, poderás obter o regulamento do torneo e mailo impreso de inscrición.

Venres, 21 de decembro de 2018
O xurado elixe os establecementos Kierete Peluquería, El Patio de Mi Casa-Perfumes e Antela Viaxes como os mellores do XIII Concurso de Escaparates Nadal 2018

[21-12-2018] Este venres, 21 de decembro, reuniuse o xurado para elixir os establecementos comerciais premiados no XIII Concurso de Escaparates de Nadal 2018, organizado pola Concellaría de Comercio, Promoción Económica, Traballo e Turismo, e no que participaron un total de 46 comercios (23 en Bertamiráns e 23 no Milladoiro). Tralo ditame do xurado, nesta edición o primeiro premio recaeu en Kierete Peluquería do Milladoiro. O segundo premio é para El Patio de Mi Casa-Perfumes, tamén do Milladoiro, mentres que o terceiro premio levouno Antela Viaxes, de Bertamiráns. Premendo no enlace que está a túa dereita, baixo o apartado de descargas, poderás obter o listado coas votacións do xurado do XIII Concurso de Escaparates.

Xoves, 20 de decembro de 2018
Plantilla coas respostas do exame tipo test realizado no proceso selectivo para a creación dunha bolsa de traballo de administrativos

[20-12-2018] O Concello de Ames, a través do departamento de Persoal, fai pública a plantilla coas respostas do exame tipo test realizado no proceso selectivo para a creación dunha bolsa de traballo de administrativos do Concello de Ames. Premendo no enlace que está a túa dereita, baixo o apartado de descargas, poderás obter dita plantilla.

Xoves, 20 de decembro de 2018
A Casa da Cultura de Bertamiráns acolle este sábado, 22 de decembro, o tradicional Concerto de Nadal

[20-12-2018] O Concello de Ames, a través da Concellaría de Cultura, organizou para este sábado, 22 de decembro, ás 20:00 horas, un concerto de Nadal no que se darán cita varias corais do concello. Neste encontro actuarán a Coral Antonio Santomil de Bugallido, a Coral de Piñeiro e Ames, a Coral Lojo Batalla de Tapia e mailo Coro de Oca. Este concerto terá lugar no auditorio da Casa da Cultura de Bertamiráns. Esta actividade está dirixida a todos os públicos. A entrada é de balde ata completar aforo.

Xoves, 20 de decembro de 2018
As nenas e nenos das escolas infantís de Ames reciben a visita do Apalpador

[20-12-2018] A actividade realizouse, por terceiro ano consecutivo, nas escolas municipais do Bosque e A Madalena, nas escolas da Rede Galiña Azul de Bertamiráns e do Milladoiro e nas escolas unitarias da Tarroeira e de Covas. O contador de contos, Anxo Moure, foi o responsable de encarnar ao Apalpador, figura da mitoloxía galega que, por estas datas, baixa das montañas do Courel para tocar a barriga das máis cativas e cativos, comprobando así a fame que estes poidan ter e deixándolles, de paso, castañas e eventualmente algún agasallo. A visita foi organizada polo Concello de Ames a través da Concellaría de Cultura.

Xoves, 20 de decembro de 2018
Biosbardos, Xestiago e Asesoría Xeral Galega SL gañan o Premio Lingua e Empresa que promove o uso do galego na actividade empresarial amesá

[20-12-2018] O xurado do Premio Lingua e Empresa decidiu por unanimidade, e conforme a posibilidade que se establece nas bases, outorgar o premio ex aequo, repartindo o importe do premio a partes iguais entre as empresas: Biosbardos, Xestiago e Asesoría Xeral Galega SL. Deste xeito, recibirán un premio económico de 833,33€ e unha campaña de difusión na Radio Municipal de Ames. Este premio foi creado polo Servizo de Normalización Lingüística e polo departamento de Promoción Económica co obxectivo de recoñecer de forma pública o uso e fomento do galego na actividade empresarial.

Mércores, 19 de decembro de 2018
Repártense 3.000 bolsas reutilizables entre os escolares de Ames para fomentar as compras nos comercios amesáns durante este Nadal

[19-12-2018] Baixo o lema Aposta polo noso, a decisión é túa, a Concellaría de Promoción Económica e Turismo, puxo en marcha unha campaña de apoio ao comercio local durante a época de Nadal. Entre as iniciativas realizadas, atópase o reparto de preto de 3.000 bolsas reutilizables, co slogan: Merca no comercio local, dalle vida ás rúas de Ames! #Adecisiónétúa, entre os escolares das escolas infantís, escolas unitarias e colexios de educación infantil e primaria. Ademais, no marco do XIII Concurso de Escaparates, premiouse aos 46 establecementos participantes coa entrega duns paraugas de cortesía para que sexan compartidos entre a súa clientela.

Mércores, 19 de decembro de 2018
Este xoves, 20 de decembro, realizarase a última andaina saudable de 2018

[19-12-2018] Este xoves, 20 de decembro, realizarase a última andaina saudable deste ano. A saída farase, ás 17.00 horas, dende o centro de saúde do Milladoiro. Despois de percorrer un traxecto circular, de 4,5 km de distancia, volverase ao punto de partida. Esta actividade, ao igual que o resto de andainas encadradas dentro do programa, trátase dunha ruta de dificultade media–baixa, que terá unha duración aproximada dunha hora ou hora e media.

Mércores, 19 de decembro de 2018
O Concello de Ames apoia a construción da nova EDAR de Compostela no lugar de Silvouta

[19-12-2018] O Concello de Ames mantén o seu rexeitamento a construción da nova EDAR de Santiago de Compostela, no lugar do Souto, e segue mantendo que a ubicación máis axeitada é en Silvouta, tal e como apoia o goberno municipal de Compostela e mailo Ministerio para a Transición Ecolóxica. Tras unhas semanas de incerteza, a reunión mantida onte en Madrid entre representantes do goberno compostelá, membros da Xunta de Galicia e do Ministerio para a Transición Ecolóxica, serviu para clarificar que a nova infraestrutura executarase na parcela da Silvouta, que acolle a actual EDAR, que non ten a capacidade necesaria.

Mércores, 19 de decembro de 2018
O Pleno aproba 20 proxectos por valor de 1,2 millóns de euros que se sufragarán con cargo ao POS+ 2019

[19-12-2018] Este martes, 18 de decembro, celebrouse un pleno extraordinario e urxente no que a Corporación municipal aprobou por unanimidade a participación do Concello de Ames no Plan provincial de cooperación ás obras e servizos de competencia municipal (Plan único de concello) “POS+ 2019” da Deputación provincial da Coruña. O Concello de Ames disporá de 1.335.090€, dos cales 1.195.090€ serán para facer novos investimentos, principalmente no rural, e 140.000€, dedicaranse ao financiamento de actividades e material das áreas de Cultura, Deportes, Servizos Sociais, Turismo e Promoción Económica. Da partida destinada a investimentos; 427.005€ corresponden a achega provincial de 2019 (antigo POS); 378.670€ son da achega provincial de 2018 (antigo PAS); 389.415€ do préstamo provincial de 2019 (antigo PAI). O 86,2% do financiamento dedícase a proxectos no rural, mentres que o 13,8% restante dedicarase a obras nos espazos urbanos.